سرینگر//
سیکریٹری ہیلتھ اینڈ میڈیکل ایجوکیشن‘ بھوپندر کمار کا کہنا ہے کہ جموں و کشمیر میں عنقریب ایک ماڈرن ڈرگ ٹیسٹنگ لیبارٹری چالو ہونے والی ہے ۔
کمارنے کہا کہ جو ہماری موجودہ لیبارٹریز ہیں ان کو بھی مزید بہتر بنایا جا رہا ہے ۔
سیکریٹری ہیلتھ کا کہنا تھا کہ کہیں سے بھی غیر معیاری ادویات کے بارے میں شکایت موصول ہوتی ہے تو فوری طور پر ضروری کارروائی عمل میں لائی جاتی ہے ۔
کمار نے ان باتوں کا اظہار منگل کے روز یہاں نامہ نگاروں کے سوالوں کے جواب دینے کے دوران کیا۔
سیکریٹری ہیلتھ نے کہا’’ہماری سٹیٹ میں بہت جلد ایک ماڈرن ڈرگ ٹیسٹنگ لیبارٹری چالو ہونے والی ہے جو لگ بھگ مکمل ہے اور اس کیلئے مشینیں بھی آنا شروع ہوئی ہیں‘‘۔
کمار کا کہنا تھا کہ ہمارے پاس بہت جلد اپنی ٹیسٹنگ سہولت ہوگی اور اس کے علاوہ جو ہماری موجودہ لیبارٹریز ہیں ان کو بھی مزید بہتر بنایا جا رہا ہے جس کیلئے حکومت نے ۲۳کروڑ روپیے واگذار بھی کئے ہیں۔
کمار نے کہا کہ ٹیسٹنگ گنجائش کو بڑھانا اور معیار کو بر قرار رکھنا ہماری توجہ کا خصوصی مرکز ہے ۔انہوں نے کہا کہ کہیں سے بھی غیر معیاری ادویات کے بارے میں شکایت موصول ہوتی ہے تو ہم فوری طور پر ضروری کارروائی کرتے ہیں۔
ہیلتھ سکریٹری کہنا تھا کہ دیہی علاقوں میں ہیلتھ افراسٹرکچر کو بہتر بنا جا رہا ہے ۔انہوں نے کہا’’ہر سطح کے ہیلتھ ادارے میں کیا سہولیات ہونی چاہئے وہ طے ہیں لیکن کبھی ایسا ہوتا ہے کہ لوگ پی ایچ سی میں ضلع ہسپتال جیسی سہولیات چاہتے ہیں جو ممکن نہیں ہے ‘‘۔
کمار کا کہنا تھا کہ ہم کمیوں کو دور کرنے کیلئے ایک روڈ میپ تیار کر رہے ہیں۔
سیکریٹری ہیلتھ نے کہا کہ ہم وقت وقت پر خالی اسامیوں کو پی ایس سی یا جے کے ایس ایس بی کو ریفر کر رہے ہیں۔انہوں نے کہا کہ ہم نے پچھلے دنوں قریب تین ہزار اسامیاں ریفر کی ہیں وہاں سے بھی ڈیڑھ دو ہزار اسامیوں کی بھرتی ہوئی ہے ۔
