راجوری میں شہری سے ۳۱ موبائل فون ‘منشیات اور نقدی بر آمد

جموں//
جموں و کشمیر کے ضلع راجوری میں ایک رہائشی مکان پر چھاپے کے دوران پولیس نے۳۱ موبائل فون‘۱۶ء۱ لاکھ روپے نقدی‘۲ وزن کرنے والی الیکٹرانک مشینیں‘۱۱ گرام ہیروئن جیسا مواد اور کچھ مشتبہ مواد بر آمد کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ڈی ایس پی ہیڈ کوارٹر مدثر حسین کی سربراہی میں پولیس کی ایک ٹیم نے قصبہ راجوری کے نبن محلے میں ایک رہائشی مکان پر چھاپہ مارا۔ انہوں نے کہا کہ یہ چھاپہ ایک ایگزیکٹیو مجسٹریٹ کی موجودگی میں مارا گیا۔
بیان کے مطابق یہ چھاپہ عزیز احمد عرف سونو چینی کے گھر پر مارا گیا۔ پولیس بیان میں مزید کہا گیا’’مکان کی مکمل طور تلاشی لی گئی اور اس دوران مکان سے۱۱گرام ہیرائین جیسا مواد، ایک لاکھ۱۶ ہزار ایک سو۳۰ روپے نقدی‘۳۱موبائل فون‘۲؍الیکٹرانک وزنی مشینیں‘۳ کیمرے‘۳ موٹر‘۴؍ایمپلیفائر‘ایک انورٹر‘ایک اسٹیبلائزر اور ایک اسپیکر بر آمد کیے گئے۔
بیان میں کہا گیا کہ عزیز احمد عرف سونو چینی کو گرفتار کیا گیا اور اس کے خلاف پولیس اسٹیشن راجوری میں این ڈی پی ایس ایکٹ کے تحت ایک کیس درج کیا گیا۔
پولیس بیان کے مطابق بر آمد شدہ املاک کا کچھ حصہ مسروقہ ہونے کا شک ہے تاہم موبائل فونوں کا استعمال تحقیقات کے بعد ہی واضح ہوگا۔
ترجمان نے بتایا کہ گرفتار شدہ راجوری میں منشیات فروشی کے معاملے میں بدنام ہے اور نوجوانوں کو نشے کی طرف راغب کر رہا تھا۔ ایس ایس پی راجوری امرتپال سنگھ کا کہنا ہے کہ گھر پر والدین کی نگرانی نوجوانوں کو نشے کی لت میں پڑنے سے بچانے کا سب سے موثر ذریعہ ہے۔