تیز آندھی:ڈل میں پھنسے سیاحو ں کو پولیس نے بچا لیا

سرینگر//
جموںکشمیر کی راجدھانی سر ینگر کے جھیل ڈل میں پیر کی سہ پہر کو موسم نے اچانک کروٹ لی جس کے ساتھ ہی تیز ہوائیں چلنے کی وجہ سے جھیل ڈل میں کشتیوں میں سوار دو درجن کے قریب سیاحوں کو ریور پولیس نے محفوظ جگہ منتقل کیا۔
سٹی رپورٹر کے مطابق پیر کی سہ پہر کو جھیل ڈل میں اس وقت سنسنی کا ماحول پھیل گیا جب تیز ہوائیں چلنے کی وجہ سے کئی شکارے جھیل ڈل کے بیچو بیچ پھنس کر رہ گئے۔
معلوم ہوا ہے کہ ریور پولیس فوری طورپر حرکت میں آئی اور خصوصی بوٹوں کے ذریعے پھنسے ہوئے سیاحوں کو محفوظ جگہ منتقل کیا۔
ریور پولیس نے سیاحوں اور مقامی لوگوں کو مشورہ دیا ہے کہ جھیل ڈل میں سیر وتفریح سے قبل موسمی حالات کے بارے میں متعلقہ محکمہ کے ساتھ رابط قائم کریں۔
ایک پولیس اہلکار نے بتایا کہ موسم میں اچانک تبدیلی اور تیز ہوائیں اس واقعے کی ذمہ دار ہیں۔
اہلکار نے مزید کہا کہ عوام کو مشورہ دیا جاتا ہے کہ وہ خراب موسمی حالات میں ڈل جھیل میں داخل ہونے سے گریز کریں۔
بتادیں کہ پچھلے چار دنوں کے دوران ریور پولیس نے متعدد سیاحوں اور شکارا چلانے والوں کو ڈوبنے سے بچایا۔