پولیس کا سوپور میں دو ملی ٹینٹ معاونین کو حراست میں لینے کا دعویٰ

سرینگر//
جموںکشمیر پولیس نے سوپور میں لشکر طیبہ سے وابستہ دو ملی ٹینٹ معاونین کو آئی ای ڈی سمیت حراست میں لینے کا دعویٰ کیا ہے۔
پولیس کے ایک ترجمان نے بتایا کہ مصدقہ اطلاع موصول ہونے کے بعد ۲۲آر آر‘۱۷۹ویںبٹالین سی آر پی ایف اور جموں وکشمیر پولیس نے سیدہ پورہ بائی پاس میں بدھ کے روز ملی ٹینٹ مخالف آپریشن شروع کیا جس دوران دو مشتبہ افراد نے راہ فرار اختیار کرنے کی کوشش کی جنہیں سلامتی عملے نے دھر دبوچا۔
ترجمان نے بتایا کہ گرفتار شدگان کی شناخت قیصر منظور میر ولد منظور احمد ساکن بہی محلہ سیدہ پورہ اور مظفر مجید میر ولد عبدالمجید میر ساکن شالپورہ براتھ کلان کے بطور ہوئی ہے۔
پولیس ترجما ن نے بتایا کہ ابتدائی پوچھ گچھ کے دوران ملی ٹینٹ معاونین نے بتایاکہ وہ مقامی سرگر م ملی ٹینٹ بلال احمد ساکن براتھ کلان سوپور کے لئے کام کر تے ہیں۔
پولیس کے مطابق گرفتار شدگان کے قبضے سے ۱۵پستول راؤنڈ‘۲۵؍اے کے گولیوں کے راؤنڈ، ایک آئی ای ڈی اور دو ہینڈ گرینیڈ برآمد کرکے ضبط کئے گئے۔
پولیس نے اس سلسلے میں کیس درج کرکے مزید تحقیقات شروع کی۔