سعودی عرب: بحرین تک جانے والے شاہ فہد پل پر مسافروں کیلئے جدید سہولیات

ریاض//
سعودی عرب میں بحرین تک جانے والے شاہ فہد پل پر سفر کرنے والوں کے لیے ڈیجیٹل سہولیات کا آغاز کردیا گیا۔
سعودی عرب کو بحرین سے جوڑنے والے شاہ فہد پل کی انتظامیہ نے سفری فیس کی ادائیگی کے لیے جسر ایپ جاری کردی ہے۔مسافر جسر ایپ کے ذریعے بحرین آمد و رفت کی سفری فیس خود کار سسٹم کے ذریعے ادا کرسکتے ہیں۔
کنگ فہد سمندری پل انتظامیہ نے ایک اور سہولت بھی مہیا کی ہے جس کی بدولت گاڑیوں کی شناخت نمبر پلیٹ ٹیکنالوجی برق کے ذریعے کرلی جاتی ہے۔
برق اسکینرز کے سامنے سے گزرنے والی گاڑی کی نمبر پلیٹ کے ذریعے تمام معلومات امیگریشن کاؤنٹر پر موجود اہلکار کے کمپیوٹر پر آجاتی ہیں۔
بحرین جانے والے شاہ فہد پل انتظامیہ نے آن لائن ادائیگی کی سہولیات میں ایک اضافہ یہ بھی کیا ہے کہ مسافر کی شناخت تسہیل کے ذریعے اسکیننگ کیمرہ سسٹم کے ذریعے کی جاتی ہے۔مخصوص چپ اسکینر گاڑی کے سامنے والے شیشے پر رکھ دیا جاتا ہے، گاڑی گیٹ پر پہنچتی ہے تو خود بخود تمام کارروائی انجام پا جاتی ہے اور گاڑی کو گزرنے کی اجازت مل جاتی ہے۔
علاوہ ازیں کیو آر کوڈ کے ذریعے ایپ خود کار ادائیگی کی سہولت بھی فراہم کی گئی ہے، جسے بار بار سفر کرنے والے ڈیجیٹل اکاؤنٹ کے ذریعے چارج کر لیتے ہیں۔