کٹرہ،بانہال ریل لائن پر بیلسٹ لیس ٹریک بچھانے کیلئے تیاریاں جاری

جموں//
اودھم پور سرینگر،بارہمولہ ریلوے لنک پر کٹرہ سے بانہال تک کئی حصوں میں بیلسٹ لیس ٹریک (بی ایل ٹی) بچھانے کے لئے تیاریاں جاری ہیں۔
بیلسٹ لیس ٹریک یا سلیب ٹریک ایک قسم کا ریلوے ٹریک انفراسٹرکچر ہے جس میں ٹائیز،سلیپرز اور بیلسٹ کے روایتی لچکدار امتزاج کو کنکریٹ یا اسفالٹ کی سخت تعمیر میں تبدیل کیا جاتا ہے ۔
متعلقہ حکام کا کہنا ہے کہ ملک کا پہلا کیبل اسٹیڈ پل ’انجی برج‘مکمل ہوچکا ہے اور بیلسٹ لیس ٹریک بچھانے کیلئے تیاریوں کا کام جاری ہے ۔
بتادیں کہ انجی پل میں گیارہ مہینوں کے ریکارڈ وقت کے اندر۲۶؍اپریل کو تمام ۹۶کیبلز سیٹ کی گئیں۔
اس پل کی کل لمبائی۵ء۷۲۵ میٹر ہے جو سطح دریا سے۳۳۱میٹر کی بلندی پر کھڑا ہے ۔انہوں نے کہا کہ دنیا کے سب سے بڑے ریلوے برج پر بی ایل ٹی بچھایا گیا ہے اور اس پر الیکٹرو، میکانکل آلات نصب کرنے کا کام جاری ہے ۔
حکام کا کہنا ہے کہ۱۱۱کلو میٹر طویل کٹرہ تا بانہال ٹریک کے مختلف حصوں میں قریب۳۰کلو میٹروں کے ٹریک پر بی ایل ٹی بچھانا ہے ۔