ہندوارہ میں جیش محمد سے وابستہ جنگجو اعانت کار گرفتار: پولیس

سرینگر//
پولیس نے شمالی کشمیر کے قصبہ ہندوارہ میں جیش محمد سے وابستہ ایک جنگجو اعانت کو گرفتار کرنے کا دعویٰ کیا۔
ایک پولیس ترجمان نے اپنے ایک بیان میں کہا کہ ہندوارہ پولیس اور فوج کی۱۵آر آر کی ایک مشترکہ ٹیم نے گنائی محلہ پازل پورہ ماگام میں معمول کی چیکنگ کے دوران ایک شخص کو روکا۔انہوں نے کہا کہ گرچہ اس شخص نے سیکورٹی فورسز کو دیکھتے ہی فرار ہونے کی کوشش کی تاہم اس کو دھر لیا گیا۔
بیان میں کہا گیا کہ تلاشی کے دوران اس شخص کی تحویل سے ایک گرینیڈ اور کچھ قابل اعتراض مواد بر آمد کیا گیا۔
بیان میں گرفتار شدہ کی شناخت خورشید احمد بٹ ولد گلزار احمد بٹ ساکن امر گڑھ تارتھ پورہ کے بطور کی گئی ہے ۔پولیس بیان میں کہا گیا کہ ابتدائی پوچھ تاچھ سے معلوم ہوا کہ وہ کالعدم جنگجو تنظیم جیش محمد سے وابستہ جنگجو اعانت کار ہے ۔انہوں نے کہا کہ اس سلسلے میں پولیس اسٹیشن ہند وارہ میں متعلقہ دفعات کے تحت ایک کیس درج کرکے مزید تحقیقات شروع کی گئی ہیں۔