جموں//
۶۲ دن طویل شری امرناتھ جی یاترا اس سال یکم جولائی کو شروع ہوگی اور یہ ۳۱؍ اگست ۲۰۲۳ کو اختتام پذیر ہوگی۔
سالانہ یاترا کیلئے آن لائن اور آف لائن طریقوں سے رجسٹریشن ۱۷؍ اپریل سے شروع ہوگی۔
لیفٹیننٹ گورنر‘ منوج سنہا نے آج یاترا اور رجسٹریشن کی تاریخوں کا اعلان کرتے ہوئے کہا کہ انتظامیہ ہموار اور پریشانی سے پاک یاترا کو یقینی بنانے کیلئے پرعزم ہے۔
لیفٹیننٹ گورنر نے کہا’’پریشانیوں سے پاک یاترا عزت مآب وزیر اعظم جناب نریندر مودی جی اور عزت مآب وزیر داخلہ جناب امیت شاہ جی کی اولین ترجیح ہے۔ انتظامیہ تمام آنے والے عقیدت مندوں اور خدمات فراہم کرنے والوں کو بہترین طبی نگہداشت اور دیگر ضروری سہولیات فراہم کرے گی۔ یاترا کے آغاز سے قبل ٹیلی کام خدمات کو فعال کر دیا جائے گا۔ تمام اسٹیک ہولڈر محکمے تال میل کے ساتھ کام کر رہے ہیں تاکہ یاترا کے ہموار انعقاد کے لیے قیام و طعام، بجلی، پانی، سیکورٹی اور دیگر انتظامات کو یقینی بنایا جا سکے۔‘‘
یاترا دونوں راستوں سے ایک ساتھ شروع ہوگی ‘ ضلع اننت ناگ کے پہلگام ٹریک اور گاندربل ضلع کے بالتل سے۔
لیفٹیننٹ گورنر نے افسران کو اعلیٰ سطح کی صفائی کو یقینی بنانے اور صفائی ستھرائی اور کچرے کے انتظام کے لیے ضروری مداخلت کرنے کی بھی ہدایت دی۔
شری امرناتھ جی شرائن بورڈ (ایس اے ایس بی) پوری دنیا کے عقیدت مندوں کے لیے صبح اور شام کی آرتی (دعا) کے براہ راست ٹیلی کاسٹ کو بھی قابل بنائے گا۔
امرناتھ جی یاترا کی ایپ کو گوگل پلے اسٹور پر دستیاب کرایا گیا ہے تاکہ یاترا، موسم کے بارے میں حقیقی وقت میں معلومات حاصل کی جا سکیں اور آن لائن کئی خدمات حاصل کر سکیں۔
لیفٹیننٹ گورنر کی زیر صدارت ایس اے ایس بی کی۴۴ویں میٹنگ کے دوران اراکین اور عہدیداروں نے شری امرناتھ جی یاترا ۲۰۲۳ کے مختلف پہلوؤں کا جائزہ لیا، بشمول رجسٹریشن، ہیلی کاپٹر خدمات کی فراہمی، خدمات فراہم کرنے والے، کیمپ، لنگر اور یاتریوں کے لیے انشورنس کور۔
