خلائی اور دفاعی شعبے میں تعاون بڑھانے کی ضرورت ہے : جنرل چوہان

نئی دہلی// چیف آف ڈیفنس اسٹاف (سی ڈی ایس) جنرل انیل چوہان نے ملک کی خلا پر مبنی دفاعی صلاحیتوں کو مضبوط بنانے کے لیے خلائی اور دفاعی شعبے میں مزید تعاون پر زور دیا ہے ۔
منگل کو یہاں انڈین اسپیس ایسوسی ایشن کے توسط سے ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کی جانب سے منعقدہ ایک سیمینار سے خطاب کرتے ہوئے جنرل چوہان نے کہا کہ خلائی صلاحیتوں کو بڑھانے کے لیے خلائی اور دفاعی شعبوں میں تعاون بڑھانے کی ضرورت ہے ۔ انہوں نے کہا کہ ملک کو جدید ترین ٹیکنالوجی کا استعمال کرتے ہوئے دوہرے استعمال والے پلیٹ فارم تیار کرنے چاہئیں۔
ڈی آر ڈی او کے چیئرمین نے بھی اس موقع پر اپنے خیالات کا اظہار کیا اور کہا کہ اکیڈمیا، اسٹارٹ اپس، چھوٹی اور بہت چھوٹی صنعتوں اور بڑی کمپنیوں کو مل کر کام کرنا ہوگا تاکہ اہداف کو حاصل کیا جاسکے ۔
پروگرام میں دفاع، خلائی شعبے اور مسلح افواج سمیت مختلف وزارتوں کے حکام نے شرکت کی۔
جنرل چوہان نے کہا کہ اس سیمینار سے قومی سلامتی پر توجہ مرکوز کرنے میں اور مستقبل کے چیلنجز کا حل تلاش کرنے میں مدد ملے گی۔ انہوں نے کہا کہ خلائی شعبے میں بڑھتی ہوئی مسابقت اور خطرات کے خدشات کے پیش نظر ہمیں اپنی صلاحیتوں میں اضافہ کرنا چاہیے تاکہ ملک اپنے مفادات کا تحفظ کر سکے ۔