حج ۲۰۲۳:عازمین کی سہولت کیلئے اقلیتی امور کی وزارت کے متعدد اقدامات

نئی دہلی//
حج۲۰۲۳کی تیاریاں پرزور طریقے سے جاری ہیں، جس کے تحت ایک طرف جہاں عازمین حج کی سہولت کیلئے اسٹیٹ بنک آف انڈیا (ایس بی آئی) کے فوریکس کارڈ کا پہلی بار انتظام کیا جارہا ہے ، وہیں دوسری طرف ان کیلئے لازمی انشورنس اسکیم کا بھی انتظام کیا جارہا ہے۔
مرکزی وزیر برائے اقلیتی امور اسمرتی ایرانی نے آج یہاں ان خیالات کا اظہار کرتے ہوئے کہا کہ مرکزی حکومت اب اسٹیٹ بنک آف انڈیا کے تعاون سے عازمین کیلئے فوریکس کارڈ کا انتظام کر رہی ہے ،جس کے ذریعے وہ بغیر کیش رقم کے ہی سفر حج پر جاسکیں گے ۔
ایرانی نے کہا کہ پہلے سفر حج کیلئے ناموں کا انتخاب ہونے پر ہر عازم حج کو روانگی سے کئی ماہ قبل حج کمیٹی کے پاس ۲۱۰۰ریال کے بقدر پیسے جمع کرانے پڑتے تھے جو انہیں امبارکیش پوائنٹ پر سفر حج پر روانگی کے وقت۲۱۰۰ریال کی شکل میں واپس ملتے تھے ۔ اور مکہ و مدینہ میں یہ پیسہ ختم ہوجانے پر عازمین کو بڑی مشکلات کا سامنا کرنا پڑتا تھا ۔ مگر اب اس کی ضرورت نہیں ہے ، بلکہ عازمین کو ایس بی آئی کے فوریکس کارڈ کا سہولت فراہم کرکے انہیں کیش رقم لیجانے سے نجات دلائی جائے گی۔
ایرایرانی نے عازمین کی تفصیلات بتاتے ہوئے کہا کہ رواں برس سفر حج پر جانے والے خواہشمند ایک لاکھ۸۴ہزار افراد نے درخواستیں دی تھیں، جن میں سے ایک لاکھ۴۰ہزار افراد کے نام آن لائن قرعہ اندازی کے ذریعے سلیکٹ ہوئے ،جنہیں فوراً ہی ایس ایم ایس کے ذریعے اطلاع دیدی گئی۔ انہوں نے کہا کہ منتخب عازمین میں۷۰یا اس سے زائد عمر کے۱۰۶۲۱ عازمین کا انتخاب عمل میں آیا جبکہ بغیر محرم کے۴۳۱۴ خاتون عازمین کو منتخب کیا گیا اور۴۵ہزار افراد کا نام ویٹنگ لسٹ میں آیا۔
مرکزی وزیر نے مزید بتایا کہ اس سال عازمین کیلئے مرکزی حکومت انشورنس کا بھی انتظام کر رہی ہے تاکہ سفر حج کے دوران حادثہ ہونے کی صورت میں متاثرین کو مالی مدد فراہم کرائی جاسکے ۔ اس کیلئے انشورنس کمپنیوں سے کم از کم پریمئم پر انشورنس الانے کیلئے بات چیت جاری ہے ۔ یہ انشورنس کرانا ہر عازم کے لئے لازمی ہوگا۔
ایس بی آئی کے منیجنگ ڈائریکٹر آلوک چودھری نے فوریکس کی تفصیلات بتاتے ہوئے کہا کہ ہندوستان کے تمام امبارکیشن پوائنٹ پر ان کے نوڈل افسران موجود ہوں گے ، جو عازمین کے لئے کیش اور فوریکس سے متعلق سہولیات دستیاب کرائیں گے ۔ انہوں نے کہا کہ ریزرو بنک آف انڈیا (آربی آئی ) کے ڈائریکشن کے مطابق ہر عازم حج دس ہزار ڈالر کی رقم فوریکس کارڈ میں ڈال سکتا ہے اور عازمین سعودی عرب پہنچ کر اپنے خرچ اور ضروریات کے لئے وہاں کے اے ٹی ایم سے ریال نکال سکتا ہے ۔اس کے علاوہ عازمین کو یہ سہولت بھی دستیاب ہوگی کہ سعودی عرب میں پیسہ ختم ہونے کی صورت میں ان کے گھر والے ہندوستان سے فوریکس کارڈ میں مزید پیسہ ڈالکر انہیں پریشانی سے بچاسکتے ہیں۔
آلوک چودھری نے بتایا کہ ہر امبارکیشن پوائنٹ پر ایس بی آئی کے نوڈل افسر موجود ہوں گے اور عازمین حج کے پاس بھی ان نوڈل افسران کی لسٹ دستیاب ہوگی۔