سرینگر//
وسطی کشمیر کے چرار شریف تحصیل کے ڈھلون گاؤں میں آتشزدگی کی ایک واردات کے دوران ایک مکان اور دو گاو خانے خاکستر ہوئے ۔
لاکھوں روپے مالیت کی گھریلو اشیائراکھ کے ڈھیر میں تبدیل۔
اطلاعات کے مطابق بدھ کی سہ پہر کو چرا رشریف کے ڈھلون علاقے میں رہائشی مکان سے آگ نمودار ہوئی جس نے آناً فاناً اپنے متصل دو گاؤ خانوں کو لپیٹ میں لے لیا۔
فائر اینڈ ایمرجنسی اور مقامی لوگوں کی بروقت کارروائی کے نتیجے میں گر چہ آگ پر قابو پایا گیا تاہم آتشزدگی کی اس واردات میں فاروق احمد میر ، علی محمد میر پسران عبدالکبیر میر کا مشترکہ مکان اور دو گاو خانے خاکستر ہوئے ۔
پولیس کے ایک سینئر عہدیدار نے یو این آئی اردو کو بتایا کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں آگ کو مزید پھیلنے سے روک دیا گیا۔
پولیس نے آگ لگنے کی وجوہات جاننے کی خاطرکیس درج کرکے مزید تحقیقات شروع کی ۔
اس دوران وسطی کشمیر کے ضلع بڈگام کے روپہ پورہ چاڈورہ علاقے میں دوران شب آگ کی ایک واردات میں قریب ایک درجن بکریاں جھلس کر ہلاک ہوگئیں۔
تفصیلات کے مطابق چاڈورہ کے روپہ پورہ علاقے میں گذشتہ شب ایک گائو خانے میں آگ لگ گئی جس کے نتیجے میں گائو خانہ خاکستر ہوگیا اور اس میں موجود ۱۲بکریاں جھلس کر ہلاک ہوگئیں۔
حکام کے مطابق بظاہر شارٹ سرکٹ ہونے سے آگ لگ گئی ہے ۔
دریں اثنا پولیس کے ایک عہدیدار نے واقعے کی تصدیق کرتے ہوئے کہا کہ روپہ پورہ چاڈورہ میں مختار احمد ولد غلام محمد پرے نامی ایک شخص کے گائو میں آگ لگ گئی جس کو فائر اینڈ ایمرجنسی سروسز نے قابو میں کر لیا۔انہوں نے کہا کہ آگ کی اس واردات میں۱۲بکریاں جھلس کر ہلاک ہوگئیں۔