این آئی اے کا سرینگر میںآئی ایس آئی ایس کیس کے سلسلے میں چھاپہ /’ڈیجیٹل مواد ضبط ‘

سرینگر///
قومی تحقیقاتی ایجنسی (این آئی اے ) کا کہنا ہے کہ اس نے ایک’آئی ایس آئی ایس‘ماڈیول کیس کے سلسلے میں پیر کے روز سری نگر میں مشتبہ شخص کے مکان پر چھاپہ ڈالا اور وہاں سے ڈیجٹل مواد برآمد کرکے ضبط کیا۔
این آئی اے کے ایک ترجمان نے اپنے ایک بیان میں کہا کہ تحقیقاتی ایجنسی نے محمد امین عرف ابو یحییٰ ساکن کڈنامانا ضلع ملاپورم کیرلہ کے بارے میں تحقیقات شروع کی تھی جو ٹیلی گرام، ہوپ اور انسٹاگرام جیسے سوشل میڈیا پلیٹ فارموں کی وساطت سے آئی ایس آئی ایس پروپگنڈا چلا رہا تھا۔
بیان میں کہا گیا کہ ان سوشل میڈیا چینلوں کے ذریعے وہ آئی ایس آئی ایس آئی کے پر تشدد جہادی نظریات کی تشہیر کرتا تھا اور آئی ایس آئی ایس آئی کے اس ماڈیول کے لئے نئی بھرتیاں کرتا تھا۔
ترجمان نے بیان میں کہا کہ ابو یحییٰ اور اس کے ساتھیوں نے ٹارگیٹ ہلاکتوں کیلئے بعض افراد کی نشاندہی بھی کی تھی۔
ان کا کہنا تھا کہ ان لوگوں نے جموں کشمیر ہجرت کرنے کا پلان بھی بنایا تھا تاکہ دہشت گردانہ سرگرمیوں کو انجام دیا جاسکے اور اس سفر کے لئے مختلف وسائل سے فنڈ بھی جمع کیا گیا تھا۔
بیان کے مطابق تحقیقات کے دوران معلوم ہوا کہ محمد امین کیرالہ کے دیپتی مارلا کے رابطے میں تھا جس نے مذہب تبدیل کیا تھا اور اس کی شادی منگلور کے انس عبدالرحمن سے ہوئی تھی۔انہوں نے مزید بتایا کہ سال ۲۰۱۵میں وہ تعلیم کے حصول کے لئے دبئی گئی تھی جہاں اس کی ملاقات مزاح صدیق سے ہوئی اور دونوں خواتین داعش کے نظریہ سے متاثر تھیں ۔
بیان کے مطابق سال۲۰۱۹میں دونوں نے خراسان سے ہجرت کرنے کی کوشش کی اورایران کی راجدھانی تہران پہنچے لیکن خراسان میں مقیم داعش دہشت گردوں کے ساتھ اُن کا رابط نہیں ہو سکا۔
بیان میں کہا گیا ہے کہ بعداز اں دونوں واپس ہندوستان آئیں اور دیپتی نے امین ، عبید حامد مٹا ، مدیش شنکر عرف عبداللہ اور دیگر سے رابط قائم کیا ور آئی ایس آئی ایس کے زیر انتظام علاقے میں ہجرت کرنے کا منصوبہ بنایا۔ہجرت کا منصوبہ بنانے کے لئے وہ جنوری ۲۰۲۰میں عبید سے ملنے سری نگر گئیں اور یہاں ایک ہفتے تک قیام کیا۔
ترجمان کے مطابق دیپتی اور عبید کے درمیان مشترکہ رابطوں میں سے ایک عزیر اظہر بٹ جس پر شبہ ہے کہ وہ اس سازش میں ملوث رہا ہے کے گھر واقع قرفلی محلہ سری نگر میں پیر کی صبح این آئی اے نے چھاپہ مارا ۔انہوں نے کہاکہ رہائشی مکان کی تلاشی کے دوران ڈیجیٹل مواد کو برآمد کرکے ضبط کیا گیا جس کی جانچ پڑتال شروع کی جاری ہے ۔