برلن//
جرمنی کی ائیرلائن کمپنی کے طیارے میں امریکی ریاست ٹیکساس سے جرمنی کیلئے پرواز بھرنے کے بعد اچانک پیدا ہونے والی ہنگامی صورتحال کے باعث 7 افراد زخمی ہوگئے۔
امریکی فیڈرل ایوی ایشن ایڈمنسٹریشن (ایف اے اے) کے مطابق لفتھانسا کے ائیر بس A330 کو 37 ہزار فٹ کی بلندی پر اچانک ائیر ٹربیولنس (turbulence) کی وجہ سے ہنگامی صورتحال کا سامنہ ہوا جس کے باعث طیارے میں سوار 7 مسافر زخمی ہوئے۔جہاز میں سوار مسافر سوزین زمرمین نے بتایا کہ طیارے کے پائلٹوں میں سے ایک نے کیبن سے بتایا کہ جہاز کی بلندی میں اچانک سے ایک ہزار فٹ کمی آگئی ہے۔
انہوں نے بتایا کہ اس وقت مجھے لگا جیسے میرے پیروں کے نیچے سے زمین نکل گئی ہو، ایک لمحے کیلئے ہر چیز ہوا میں اڑنے لگی تھی ایسے کہ جیسے آپ خود کو بھی بے وزن محسوس کر رہے ہوں۔
جرمن ائیر لائن کی جانب سے جاری بیان میں کہا گیا ہے کہ جہاز کے اڑان بھرنے کے 90 منٹ بعداسے ائیر ٹربیولنس کا سامنہ ہوا جس کے باعث جہاز کو ہنگامی بنیادوں پر بحفاظت لینڈ کروا لیا گیا تھا، مسافروں اور عملے کی حفاظت ہماری اولین ترجیح ہے، واقعے میں مسافروں کو معمولی چوٹیں آئیں، زخمی مسافروں کو طبی امداد دے دی گئی ہے۔
واضح رہے کہ ٹربیولنس دراصل ہوا کے غیر مستحکم بہاؤ کو کہا جاتا ہے جس کی پیش گوئی کرنا مشکل ہوتا ہے، کئی لوگ اسے طوفان سے بھی تشبیح دیتے ہیں تاہم سب سے خطرناک ’کلیئر ائیر ٹربیولنس‘ ہوتی ہے جس کے بارے میں اندازہ قائم کرنا مشکل ہوتا ہے اور کھلے آسمان میں بھی اس کے آثار کا مشاہدہ نہیں کیا جا سکتا۔