’ہماری تہذیب ہمیں توڑنے کے بجائے جوڑنا سکھاتی ہے‘

نئی دہلی///
وزیر اعظم نریندر مودی نے آج جی۲۰ممالک کے وزرائے خارجہ پر زور دیا کہ وہ مہاتما گاندھی اور گوتم بدھ کی سرزمین پرہندوستانی تہذیب اور اخلاقیات سے تحریک لیں جو ہمیں تقسیم کرنے کے بجائے متحد ہونے پر توجہ مرکوز کرتی ہے ۔
مودی نے جی۲۰وزرائے خارجہ سربراہی اجلاس کے آغاز کے موقع پر اپنے ویڈیو پیغام میں دورہ کرنے والے وزرائے خارجہ سے یہ اپیل کی۔
وزیر اعظم نے اس بات پر افسوس کا اظہار کیا کہ دوسری جنگ عظیم کے بعد عالمی حکمرانی کا نظام اپنے مقاصد میں ناکام ہو چکا ہے اور ترقی پذیر ممالک اس کی ناکامی کے انتہائی المناک نتائج بھگت رہے ہیں۔ اس لیے وہ ترقی پذیر ممالک کی آواز سنیں اور اپنے اختلافات سے اوپر اٹھ کر متحد ہو کر دنیا کو معاشی بحران سے بچانے میں اپنا تعاون ادا کریں۔
مودی نے کہا ہے کہ ہندوستان کی جی۲۰کی صدارت میں ایک ’کرۂ ارض‘ ایک کنبہ اور ایک مستقبل ‘کے موضوع کا انتخاب کیا ہے ۔انہوں نے وضاحت کی کہ یہ مقصد کے اتحاد کے ساتھ ساتھ عمل کے اتحاد کی ضرورت کا اشارہ کرتا ہے ۔ انہوں نے اس یقین کا اظہار کیا کہ آج کا اجلاس مشترکہ اور ٹھوس مقاصد کے حصول کیلئے اکٹھا ہونے کے جذبے کی عکاسی کرے گا۔
اس بات کو تسلیم کرتے ہوئے کہ آج دنیا میں کثیرالجہتی بحران کی کیفیت سے دوچار ہے‘ وزیر اعظم نے ان دو اہم کاموں کی نشاندہی کی جن کا مقصد دوسری عالمی جنگ کے بعد تخلیق کردہ عالمی طرز حکمرانی کے ڈھانچے سے کیا جانا تھا۔انہوں نے وضاحت کی کہ سب سے پہلے ، مسابقتی مفادات کو متوازن کرکے مستقبل کی جنگوں کو روکنا تھا، اور دوسرا، مشترکہ مفادات کے مسائل پر بین الاقوامی تعاون کو فروغ دینا تھا۔
وزیر اعظم نے کہا ’’گزشتہ چند برسوں کا تجربہ‘ مالیاتی بحران، موسمیاتی تبدیلی، وبائی امراض، دہشت گردی اور جنگ ‘ صاف ظاہر کرتا ہے کہ عالمی گورننس اپنے دونوں مینڈیٹ میں ناکام رہی ہے ۔ان کاکہنا تھا’’ ہمیں یہ بھی تسلیم کرنا چاہیے کہ اس ناکامی کے المناک نتائج سب سے زیادہ ترقی پذیر ممالک کو بھگتنا پڑ رہے ہیں‘‘۔
مودی نے کہا کہ برسوں کی ترقی کے بعد، ہم آج پائیدار ترقی کے اہداف پر واپس جانے کے خطر ات کا شکار ہیں۔’’ بہت سے ترقی پذیر ممالک اپنے لوگوں کے لیے خوراک اور توانائی کے تحفظ کو یقینی بنانے کی کوشش کرتے ہوئے غیر پائیدار قرضوں کے ساتھ جدوجہد کر رہے ہیں۔ وہ امیر ممالک کی وجہ سے گلوبل وارمنگ سے سب سے زیادہ متاثر بھی ہیں۔ یہی وجہ ہے کہ ہندوستان کی جی۲۰صدارت نے گلوبل ساؤتھ کو آواز دینے کی کوشش کی ہے ‘‘۔
وزیراعظم نے کہا’’کوئی بھی گروہ اپنے فیصلوں سے سب سے زیادہ متاثر ہونے والوں کو سنے بغیر عالمی قیادت کا دعویٰ نہیں کر سکتا‘‘۔ انہوں نے کہا’’آپ گہری عالمی تقسیم کے وقت مل رہے ہیں۔ بحیثیت وزرائے خارجہ، یہ فطری ہے کہ آپ کی بات چیت آج کے جغرافیائی سیاسی تناؤ سے متاثر ہوتی ہے ۔ ان تناؤ کو کیسے حل کیا جانا چاہیے اس بارے میں ہم سب کے اپنے موقف اور اپنے نقطہ نظر ہیں۔ تاہم، دنیا کی سرکردہ معیشتوں کے طور پر، ہماری ان لوگوں کے لیے بھی ذمہ داری ہے جو اس کمرے میں نہیں ہیں‘‘۔
مودی نے کہا کہ دنیا نمو کے چیلنجوں کو کم کرنے کیلئے جی ۲۰کی طرف دیکھ رہی ہے ۔ ترقی، اقتصادی لچک، آفات سے نمٹنے‘مالی استحکام‘بین الاقوامی جرائم‘ بدعنوانی، دہشت گردی نیز خوراک اور توانائی کے تحفظ، ان تمام شعبوں میں‘ جی۲۰کے پاس اتفاق رائے پیدا کرنے اور ٹھوس نتائج دینے کی صلاحیت ہے ۔
وزیر اعظم کاکہنا تھا’’ ہمیں ان مسائل کی اجازت نہیں دینی چاہیے جو ہم مل کر حل نہیں کر سکتے بلکہ ہمیں ان مسائل کو اٹھانا چاہئے جنہیں ہم حل کرسکتے ہیں۔ جیسا کہ آپ گاندھی اور بدھ کی سرزمین پر مل رہے ہیں، میں دعا کرتا ہوں کہ آپ ہندوستان کے تہذیبی اخلاق سے متاثر ہوں گے ۔ اس بات پر توجہ مرکوز کرنے کیلئے نہیں جو ہمیں تقسیم کرتی ہے ، بلکہ اس بات پر جو ہم سب کو متحد کرتی ہے ۔‘‘