’سرکاری اراضی کا تحفظ ناگزیر‘

سرینگر///
صوبائی کمشنر کشمیر‘ وجے کمار بدھوری نے واضح کیا ہے کہ انسداد تجاوزات مہم کے دوران غریبوں کے ساتھ چھیڑ چھاڑ نہیں کی جائے گی۔
بدھوری نے کہاکہ لیفٹیننٹ گورنر منوج سنہا نے پہلے ہی اس بارے میں سرکار کی پوزیشن واضح کی ہے ۔اُن کے مطابق سٹیٹ لینڈ کا تحفظ سرکار کا کام ہے اور’’ وہ ہم کسی بھی صورت میں کریں گے ‘‘۔
نو منتخب صوبائی کمشنر نے ان باتوں کا اظہار سرینگر میں نامہ نگاروں سے بات چیت کے دوران کیا۔
انسداد تجاوزات مہم کے بارے میں پوچھے گئے سوال کے جواب میں صوبائی کمشنر نے کہاکہ جیسا کہ لیفٹیننٹ گورنر منوج سنہا نے پہلے ہی واضح کیا ہے کہ کسی غریب کے ساتھ چھیڑ چھاڑ نہیں کی جائے گی لہذا جو کچھ بھی ایل جی نے کہا اُس پر سبھی کو بھروسہ کرنا چاہئے ۔
صوبائی کمشنر نے کہاکہ کسی کو ڈرنے کی کوئی ضرورت نہیں اور جو اراضی ہم تحویل میں لے رہے ہیں اُس کو لوگوں کی فلاح و بہبود کی خاطراستعمال میں لایا جائے گا۔انہوں نے مزید بتایا کہ سٹیٹ لینڈ کا تحفظ ہمار ا کام ہے اور اس پر کوئی سمجھوتہ نہیں کیا جائے گا۔
ڈویژنل کمشنر کشمیر کے مطابق صوبہ کشمیر میں غیر جانبدارانہ طریقے سے سٹیٹ لینڈ کو باز یاب کرنے کی خاطر کام ہو رہا ہے ۔
آن لائن سروس شروع ہونے کے بارے میں صوبائی کمشنر نے کہاکہ اب لوگوں کو پٹواری اور تحصیل آفس میں جانے کی کوئی ضرورت نہیں ۔
بدھوری نے کہاکہ زمین کے کاغذات اور دوسرے معاملات کی خاطر اب گھر میں ہی لوگ آئن لائن سروس کے ذریعے سب کچھ حاصل کرسکتے ہیں اور اس طریقہ کار سے شفافیت کو بھی یقینی بنانے میں مدد ملے گی۔
صوبائی کمشنر نے کہاکہ سرینگر کو جاذب نظر بنانے کی خاطر بڑے پیمانے پر تعمیر وترقی کے کام شروع کئے گئے ہیں۔صوبائی کمشنر کشمیر کا مزید کہنا تھا کہ جی ۲۰؍اجلاس کے پیش نظر شہر کو خوبصورت بنایا جارہا ہے ۔
کھیل کود کی سرگرمیوں کو بڑھاوا دینے کے بارے میں صوبائی کمشنر نے کہاکہ سپورٹس کے ذریعے ہی نوجوان کو برائیوں سے دور رکھاجاسکتا ہے ۔
بدھوری نے کہاکہ موجودہ ایل جی انتظامیہ نے یونین ٹریٹری میں کھیل کود کی سرگرمیوں کو بڑھاوا دیا اور اس حوالے سے مزید اقدامات اُٹھائے جارہے ہیں۔