یہ ملک جتنا مودی اور بھاگوت کا ہے اتنا ہی میرا بھی ہے َمولانا مدنی

نئی دہلی/۱۱فروری
جمعیتہ علماءہند کے صدر محمود مدنی نے کہا کہ ہندوستان ان کا اتنا ہی ہے جتنا وزیر اعظم نریندر مودی اور راشٹریہ سویم سیوک سنگھ (آر ایس ایس) کے سربراہ موہن بھاگوت کا ہے۔
قومی دارالحکومت کے رام لیلا میدان میں جمعیتہ علماءہند کے افتتاحی اجلاس سے خطاب کرتے ہوئے مولانا مدنی نے کہا کہ ہندوستان ہمارا ملک ہے، یہ ملک اتنا ہی محمود مدنی کا ہے جتنا نریندر مودی اور موہن بھاگوت کا ہے۔ ”محمود ان سے ایک انچ آگے ہے اور نہ ہی وہ محمود سے ایک انچ آگے ہیں“۔
مولانا مدنی کا مزید کہنا تھا کہ اسلام اس ملک کا قدیم ترین مذہب ہے۔ انہوں نے کہا ”یہ سرزمین مسلمانوں کا پہلا وطن ہے۔ یہ کہنا کہ اسلام ایک مذہب ہے جو باہر سے آیا ہے، سراسر غلط اور بے بنیاد ہے۔ اسلام تمام مذاہب میں سب سے قدیم مذہب ہے۔ ہندی مسلمانوں کے لیے ہندوستان بہترین ملک ہے۔“
جمعیتہ علماءہند کے سربراہ نے کہا کہ وہ زبردستی مذہب کی تبدیلی کے خلاف ہیں۔ انہوں نے مزید کہا کہ آج جو لوگ اپنی مرضی سے مذہب تبدیل کر رہے ہیں انہیں بھی جھوٹے الزامات کے تحت جیل بھیجا جا رہا ہے۔
مولانا مدنی نے کہا”ہم زبردستی مذہب کی تبدیلی کے خلاف ہیں۔ مذہب کی آزادی ایک بنیادی حق ہے۔ ہم زبردستی، دھوکہ دہی اور لالچ کے ذریعے تبدیلی کے بھی خلاف ہیں۔ ایجنسیوں کی طرف سے مسلم کمیونٹی کو نشانہ بنانے کی بہت سی مثالیں ہیں، جیسے کہ نماز پر پابندی۔ ان پر پولیس ایکشن، اور بلڈوزر ایکشن“۔
جمعیتہ علماءہند کا تین روزہ مکمل اجلاس جمعہ کو دہلی میں شروع ہوا۔
جمعیتہ علماءہند کے مطابق یکساں سول کوڈ، مذہبی آزادی اور مسلم پرسنل لاءاور مدارس کی خود مختاری ان چند امور میں شامل ہیں جن پر کنونشن میں تبادلہ خیال کیا جائے گا۔ مزید، اس نے کہا کہ سماجی، اقتصادی طور پر پسماندہ مسلمانوں کے لیے ریزرویشن فراہم کرنے کے لیے ایک تجویز لایا جا سکتا ہے۔
جمعیتہ علماءہند کے 34ویں اجلاس میں مذہبی بھائی چارے کو مضبوط کرنے کے لیے کیے جانے والے اقدامات اور نفرت انگیز مہمات کو روکنے کے لیے اقدامات بھی ایجنڈے کا حصہ ہیں۔
جمعیت علمائے ہند ایک صدی پرانی تنظیم ہے، اور مسلمانوں کے شہری، مذہبی، ثقافتی اور تعلیمی حقوق کے تحفظ کے لیے کام کرتی ہے۔ جمعیت مسلمانوں کی سب سے بڑی تنظیم ہونے کا دعویٰ کرتی ہے اور مسلمانوں کے سماجی، سیاسی اور مذہبی مسائل اس کے ایجنڈے میں شامل ہیں۔