ٹی ٹوئنٹی میچ کا 70سے 80فیصد حصہ پہلے6 اوورز کے انداز سے طے ہوتا ہے،شرجیل خان

کراچی //شرجیل خان نے کہا ہے کہ ٹی ٹوئنٹی میچ کا 70سے 80فیصد حصہ پہلے6اوورز کے انداز سے طے ہوتا ہے،انہوں نے گزشتہ سالوں میں سیکھا ہے کہ سب سے زیادہ بائونڈری رکھنے والی ٹیم میچ جیتی ہے، اس لیے وہ پہلے 6 اوورز میں تیز کھیلنے کی کوشش کرتاہیں۔پاکستان کرکٹ بورڈ سے ہفتہ کو جاری اعلامیہ کے مطابق انہوں نے کہا کہ وہ اپنی ٹیم کے لئے ایک ٹھوس پلیٹ فارم تیار کرنے کی کوشش کرتے ہیں اور اگر وہ پہلے چھ اوورز کے مکمل ہونے کے بعد بیٹنگ جاری رکھتے ہیں تو وہ اس بات کو یقینی بناتے ہیں کہ وہ اس رفتار کو برقرار رکھیں۔
انہوں نے کہا کہ یہ ضروری ہے کہ بنیادی باتوں کو نہ بھولیں اور حالات کا اندازہ لگانے کی کوشش کریں،اس لیے عام طور پروہ چار گیندیں یا ایک اوور لینے کی کوشش کرتے ہیں کیونکہ ہر دن نیا دن ہوتا ہے اور حالات مختلف ہوتے ہیں۔
انہوں نے کہا کہ چاہے وہ کسی سپنر کا سامنا کر یں یا پیسرکا، منصوبہ بندی ایک ہی ہوتی ہے، حالات کا جائزہ لیں اور پھر اٹیک کریں اور یہ اکثر ٹیم کے لیے بھی فائدہ مند ثابت ہوتا ہے۔
شرجیل خان ایچ بی ایل پی ایس ایل میں سنچری بنانے والے پہلے بیٹس مین ہیں۔ انہوں نے پی ایس ایل کے افتتاحی ایڈیشن کے دوسرے کوالیفائر میں پشاور زلمی کے خلاف اسلام آباد یونائیٹڈ کے لیے 62گیندوں پر 117 رنز بنائے جس میں 8چھکے بھی شامل تھے جس کی بدولت بالآخر اسلام آباد کو افتتاحی ایڈیشن کا تاج پہنایا گیا۔ انہوں نے پی ایس ایل میں 72چھکے مارے ہیں جو فخر سے ایک چھکا کم ہے۔2020میں پی ایس ایل میں واپسی کے بعد سے کراچی کنگز کی نمائندگی کرنے والے شرجیل ہر 4.5گیندوں پر ایک بائونڈری مارتے ہیں جس کی وجہ پاور پلے سے زیادہ سے زیادہ فائدہ اٹھانے کی خواہش ہے۔