سرینگر/۱۲جنوری
وسطی کشمیر کے ضلع گاندربل کے سونہ مرگ علاقے میں ایک برفانی تودا گر آیا جس کے نتیجے میں دو مزدور زندہ دفن ہوئے ۔
معلوم ہوا ہے کہ انتظامیہ نے فوری طورپر ریسکیو آپریشن شروع کیا اور جمعرات کی سہ پہر تک ایک مزدور کی لاش برآمد کی گئی جبکہ دوسرے کی تلاش ہنوز جاری ہے ۔
ذرائع نے بتایا کہ گاندربل کے سر بل سونہ مرگ علاقے میں ایک بھاری بھرکم برفانی تودا گر آیا۔انہوں نے کہا کہ برفانی تودا گر آنے کی اطلاع ملنے کے بعد ضلع انتظامیہ ، پولیس اور فوج نے ریسکیو آپریشن شروع کیا۔
ذرائع نے میگا ٹنل میں کام کرنے والے برفانی تودے کے نیچے زندہ دفن ہوئے جنہیں تلاش کرنے کی خاطر فوری طورپر آپریشن شروع کیا۔ معلوم ہوا ہے کہ ریسکیو ٹیم نے لاپتہ مزدور کی لاش برآمد کی جبکہ اُس کے ساتھی کی تلاش جاری ہے ۔
ابھی تک یہ واضح نہیں ہو سکا کہ برفانی تودے کے نیچے کتنے لوگ دفن ہیں۔ مقامی ذرائع کا کہنا ہے برفانی تودا گر آنے کے بعد پانچ افراد لاپتہ ہوئے تاہم انتظامیہ کے ایک سینئر عہدیدار نے بتایا کہ صرف دو مزدوروں کے زندہ دفن ہونے کی خبر ملی ہے اور ابھی تک صرف ایک مزدور کی لاش برآمد کی گئی ہے ۔
سرکاری ذرائع کا مزید کہنا ہے کہ پولیس، فوج ، ایس ڈی آر ایف اور ٹنل کے کام پر مامور افراد کی جانب سے ریسکیو آپریشن جاری ہے ۔
دریں اثنا حکام علاقے میں تازہ صورتحال پر کڑی نگاہ رکھے ہوئے ہیں۔ایک سرکاری عہدیدار کے مطابق علاقے کو احتیاطی طور پر بند کر دیا گیا ہے اور لوگوں سے تاکید کی گئی ہے کہ وہ گھروں سے غیر ضروری باہر نکلنے سے احتراز کریں۔انہوں نے کہا کہ حکام نے لوگوں کو مدد کے لئے ایمرجنسی ہیلپ لائن نمبرس فراہم کئے ہیں۔
بتادیں کہ محکمہ موسمیات کی پیش گوئی کے مطابق وادی کشمیر کے بالائی علاقوں میں برف باری جبکہ میدانی علاقوں میں بارشیں ہوئیں۔
