یوم جمہوریہ کے پیش نظر سرحدوں پر چوکسی بڑھائی گئی

سرینگر//
بارڈر سیکورٹی فورس (بی ایس ایف ) کے آئی جی ‘ اشوک یادونے بدھ کے روز کہا کہ دراندازی کی کوششوں کے باوجود کنٹرول لائن پر حالات پوری طرح سے قابو میں ہے ۔
یادو نے کہاکہ سرحدوں پر تعینات افواج کسی بھی چیلنج کا مقابلہ کرنے کیلئے تیارہیں۔اُن کے مطابق یوم جمہوریہ کے پیش نظر سرحدوں پر چوکسی دوگنی کردی گئی ہے ۔
ان باتوں کا اظہار بی ایس ایف کے آئی جی نے یہاں نامہ نگاروں سے بات چیت کے دوران کیا۔
یادو نے کہاکہ لائن آف کنٹرول پوری طرح سے محفوظ ہے اور بی ایس ایف جوان اپنے فرائض خوش اسلوبی کے ساتھ انجام دے رہے ہیں۔
آئی جی نے کہا ’’ سرحدوں پر تعینات افواج نے امسال دراندازی کی کئی کوششوں کو ناکام بنایا جس دوران ہتھیار و گولہ بارود کو برآمد کرکے ضبط کیا گیا‘‘۔انہوں نے کہا کہ سرحدیں پوری طرح سے محفوظ ہیں اور اس کو مزید محفوظ بنانے کی خاطر زمینی سطح پر اقدامات اٹھائے جارہے ہیں۔
یادو کے مطابق سرحدوں پر تعینات افواج چوبیس گھنٹے اپنے فرائض خوش اسلوبی کے ساتھ انجام دے رہے ہیں اور کسی کو بھی اس طرف آنے کی اجازت نہیں دی جائے گی۔
بی ایس ایف کے آئی جی نے مزید بتایا کہ یوم جمہوریہ کے پیش نظر پاکستان کے ساتھ لگنے والی سرحدوں پر فوج کو مستعد رہنے کے احکامات صادر کئے گئے ۔انہوں نے کہاکہ سرحدی پر چوکسی بڑھائی گئی اور فوج کو ہدایت دی گئی ہے کہ وہ ایسی کوئی جگہ نہ چھوڑے جہاں سے ملی ٹینٹ اس طرف آنے کی کوشش کریں۔
یادوکے مطابق ایل او سی پر چوکسی دوگنی کردی گئی جبکہ پیٹرولنگ اور فوج کی تعیناتی مزید مضبوط کی جارہی ہیں۔
بارڈر سیکورٹی فورس کے آئی جی پی نے بتایا کہ ایل او سی پر فوج کسی بھی چیلنج کا مقابلہ کرنے کیلئے پوری طرح سے تیار ہیں۔