کانگریس کا کنونشن 24 سے 26 فروری تک رائے پور میں ہوگا

نئی دہلی،// کانگریس کا مکمل اجلاس اس بار 24 فروری سے 26 فروری تک چھتیس گڑھ کی راجدھانی رائے پور میں منعقد ہوگا۔
کانگریس کے جنرل سکریٹری کے سی وینوگوپال نے پیر کے روز یہاں پارٹی کے صدر دفاتر میں منعقدہ پریس کانفرنس میں بتایا کہ یہ کنونشن تین دن کا ہوگا اور کانگریس کے زیر اقتدار چھتیس گڑھ میں 24، 25 اور 26 فروری کو منعقد ہوگا۔
انہوں نے بتایا کہ یہ کانگریس کا 85 واں مکمل اجلاس ہوگا۔ یہ اجلاس کانگریس صدر کے انتخاب کے بعد منعقد ہو رہا ہے ۔ کانگریس کے دستور کے مطابق، پارٹی کی سب سے اعلیٰ پالیسی ساز تنظیم کانگریس ورکنگ کمیٹی بھی اسی اجلاس میں تشکیل دی جائے گی۔ اس وقت ورکنگ کمیٹی کے بجائے کارگزار کمیٹی کام کر رہی ہے ۔
کانگریس لیڈر نے بتایا کہ 7 ستمبر سے کانگریس لیڈر راہل گاندھی کی قیادت میں تمل ناڈو کے کنیا کماری سے شروع ہونے والی ‘بھارت جوڑو یاترا’ اس ماہ جموں و کشمیر کے سری نگر میں ختم ہوگی۔ اس کے بعد پارٹی ‘ہاتھ سے ہاتھ جوڑو مہم’ چلانے کے ساتھ مکمل کنونشن کی تیاری کرے گی۔