کنزر میں آتشزدگی، تین دکانیں اور ایک کمپیوٹر انسٹی ٹیوٹ کو نقصان‘اہلکار زخمی

سرینگر//
شمالی کشمیر کے ضلع بارہمولہ کے کنزر علاقے میں جمعرات کی صبح آگ کی ایک واردات میں کم سے کم تین دکانیں اور ایک کمپیوٹر انسٹی ٹیوٹ خاکستر ہوگیا جبکہ اس دوران ایک فائر فائیٹر زخمی ہوگیا۔
سرکاری ذرائع نے بتایا کہ ٹنگمرگ کے کنزر علاقے میں جمعرات کی صبح ایک شاپنگ کمپلیکس جس میں کئی دکان اور ایک کمپیوٹر انسٹی ٹیوٹ واقع ہیں، میں آگ نمودار ہوگئی۔
ذرائع نے کہا کہ اطلاع موصول ہوتے ہی فائر ٹنڈرس جائے واردات پر پہنچ گئے اور آگ بجھانے کی کوششوں میں جٹ گئے ۔ان کا کہنا تھا کہ آگ کی اس واردات میں تین دکان اور ایک کمپیوٹر انسٹی ٹیوٹ کو نقصان پہنچا۔
ذرائع نے کہا کہ آگ بجھانے کی کوششوں کے دوران ایک فائر فائیٹر عمارت سے گر جانے کی وجہ سے زخمی ہوگیا۔انہوں نے کہا کہ زخمی کو فوری طور علاج معالجے کے لئے ہسپتال پہنچایا گیا۔زخمی کی شناخت خورشید احمد بٹ کے بطور ہوئی ہے ۔
دریں اثنا پولیس نے اس ضمن میں کیس درج کرکے کارروائیاں شروع کی ہیں۔انہوں نے کہا کہ آگ لگنے کی وجوہات معلوم کی جا رہی ہیں۔