تمام سیکولر جماعتیں بھارت جوڑو یاترا میں شرکت کریں گی:وقار رسول

سرینگر//
جموںکشمیر پردیش کانگریس کمیٹی کے صدر‘ وقار رسول کا کہنا ہے کہ بھارت جوڑو یاترا میں جموں کشمیر کی تمام سیکولر سیاسی جماعتیں شرکت کریں گی تاہم فرقہ پرست جماعتیں اس سے دور ہی رہیں گی۔
وانی نے کہا کہ جموں کشمیر کے لوگ اس یاترا کا انتظار کر رہے ہیں۔
کانگریس کے یو ٹی صدر نے ان باتوں کا اظہار بدھ کو جنوبی کشمیر کے ضلع اننت ناگ میں نامہ نگاروں کے ساتھ بات کرنے کے دوران کیا۔انہوں نے کہا’’جموںکشمیر کے لوگ بھارت جوڑو یاترا کا انتظار کر رہے ہیں‘‘۔
وانی کا کہنا تھا’’ہم اس میں بے روزگاری اور مہنگائی کا خاتمہ‘ملک سے نفرت دور کرنے کے مطالبوں کے علاوہ ریاستی درجے کی بحالی اور فوری انتخابات کا مطالبہ کریں گے ‘‘۔
کانگریسی لیڈر نے کہا کہ ملک کی باقی ریاستوں کی طرح جموں کشمیر میں بھی اس یاترا کا والہانہ استقبال کیا جائے گا۔انہوں نے کہا’’سیکولر جماعتیں اس یاترا میں حصہ لیں گی لیکن فرقہ پرست جماعتیں دور ہی رہیں گی‘‘۔
وانی کا کہنا تھا’’بی جے پی نفرت پھیلا رہی ہے اور ہم اس یاترا سے اس نفرت کا صفایا کر رہے ہیں۔‘‘