سرینگر//
جموں و کشمیر کے دارالحکومت سرینگر میں واقع شیر کشمیر انسٹی ٹیوٹ آف میڈیکل سائنسز (اسکمز ) کے ڈائریکٹر ڈاکٹر‘ پروفیسر پرویز احمد کول نے دعویٰ کیا کہ وادی میں شوہروں کی جانب سے اپنی بیگمات کو گردے عطیہ کرنے کی شرح میں کافی اضافہ ہوا ہے جو ان کے مطابق، کافی خوش آئند ہے۔
سماجی رابطہ ویب سائٹ ٹوئٹر پر اپنے خیالات ظاہر کرتے ہوئے اْن کا کہنا تھا ’’کشمیر میں گردے کے عطیہ میں ایک بہت خوش آئند رجحان دیکھا جا رہا ہے‘‘۔
ڈاکٹر کول نے کہا کہ مردوں کی ایک بڑی تعداد، خواتین کی بڑھتی ہوئی گردوں کی ناکامی کے ساتھ اپنی اہلیہ کے لیے گردے کا عطیہ دینے کے لیے آگے آ رہی ہے۔ یہ صحت مند رجحان کچھ عرصہ پہلے تک نہیں دیکھا گیا تھا۔ تمام عطیہ دہندگان کو سلام۔
ڈائریکٹر اسکمز کا مزید کہنا تھا’’لیکن خواتین کا اپنے شریک حیات کے لیے ممکنہ عطیہ دہندگان کے طور پر آگے آنا بہت معمول کی بات ہے۔ حالانکہ اب رجحان ظاہر کرتا ہے کہ اب مرد بھی اس کام کے لیے آگے آ رہے ہیں۔ تاہم واضح طور پر خواتین زیادہ قربانی دیتی ہیں۔‘‘