سرینگر/۲۰دسمبر
شمالی کشمیر کے ضلع بانڈی پورہ میں منگل کی صبح ایک انتہائی المناک واقعے میں ایک عمر رسیدہ شخص کی وقت اچانک موت واقع ہوئی جب وہ بڑھاپے کی پنشن کی فارم جمع کرنے کےلئے قطار میں کھڑا اپنی بھاری کا انتظار کر رہا تھا۔
ذرائع نے بتایا کہ بانڈی پورہ کے تحصیل سوشل ویلفئر دفتر پر منگل کی صبح ایک عمر رسیدہ شخص اولڈ ایج پنشن فارم جمع کرنے کےلئے قطار میں کھڑا اپنی بھاری کا انتظار کر رہا تھا کہ وہ اچانک بے ہوش ہوگیا۔
ذرائع نے کہا کہ مذکورہ بزرگ کو علاج و معالجے کے لئے فوری طور پر ضلع ہسپتال بانڈی پورہ پہنچایا گیا جہاں ڈاکٹروں نے اس کو مردہ قرار دیا۔
متوفی کی شناخت ثنا واللہ بٹ ولد غلام حسن بٹ ساکن ملن گام کے بطور ہوئی ہے ۔
دریں اثنا ہسپتال ذرائع نے موت کی تصدیق کی اور ان کا کہنا ہے کہ بزرگ کی موت غالباً حرکت قلب بند ہونے سے واقع ہوئی ہے ۔
عوامی حلقوں کا کہنا ہے کہ وادی میں عمر رسیدہ افراد کو اولڈ ایج پنشن حاصل کرنے یا اس کے لئے درخواستیں جمع کرنے کے لئے لمبی قطاروں میں کھڑا ہو کر گھنٹوں انتظار کرنا پڑتا ہے جو ان لوگوں کے لئے عمر کے اس حصے میں انتہائی کرب ناک مسئلہ ہے ۔
لوگوں کا مطالبہ ہے یہ پنشن عمر رسیدہ افراد کے بینک کھاتوں میں ہر ماہ باقاعدگی کے ساتھ جمع ہونا چاہئے اور ان کے لئے درخواستیں جمع کرانے کا عمل بھی آسان بنایا جانا چاہئے ۔
قابل ذکر ہے کہ جموں وکشمیر پیپلز کانفرنس کے سربراہ سجاد غنی لون نے قریب ایک ہفتے قبل اپنے ایک ٹویٹ میں کہا تھا کہ کورونا جیسی وبا کا ریکارڈ وقت میں ویکسین تیار کیا گیا لیکن ہمارے یہاں موجودہ ڈیجیٹل زمانے میں بھی عمر رسیدہ افراد کو پنشن حاصل کرنے کےلئے قطاروں میں کھڑا رہنا پڑتا ہے ۔
ان کا کہنا تھا کہ ان عمر رسیدہ افراد کو دفتروں پر طلب کرنا اور انتظار کرانا ایک قدیم عمل ہے ۔
