پلوامہ آئی ای ڈی بر آمدگی کیس:۸؍افراد کیخلاف چارج شیٹ پیش

سری نگر//
جموں وکشمیر پولیس نے منگل کے روز ضلع پلوامہ کے آرمولہ لاسی پورہ میں آئی ای ڈی بر آمدگی کیس کے سلسلے میں ایک عدالت میں۸؍افراد کے خلاف چارج شیٹ دائر کیا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پلوامہ پولیس نے پولیس اسٹیشن لٹر میں درج دھماکہ خیز مواد ایکٹ کے تحت ایک ایف آئی آر کے سلسلے میں سری نگر میں ایک خصوصی عدالت میں آٹھ افراد کے خلاف چارج شیٹ پیش کیا۔
ترجمان نے کہا کہ یہ چارج شیٹ آرمولہ لاسی پورہ میں سال رواں کے۱۶ جون کو برآمد کی گئی ایک آئی ای ڈی کیس کے سلسلے میں پیش کیا گیا۔
بیان میں کہا گیا’ ’۱۶ جون کو پلوامہ پولیس کو ایک اطلاع موصول ہوئی کہ پولیس اسٹیشن لٹر کے حدود کے اندر پولیس و سیکورٹی فورسز کو نقصان پہنچانے کی غرض سے ایک آئی ای ڈی نصب کی گئی ہے‘‘۔
بیان کے مطابق پولیس نے اطلاع موصول ہوتے ہی کارروائی عمل میں لاتے ہوئے مذکورہ مقام پر چھاپہ مار کر ایک پریشر کوکر کے ساتھ فٹ کی گئی ۱۵ کلو وزنی آئی ای ڈی بر آمد کی اور دو ملزموں کو بھی گرفتار کیا گیا۔
پولیس ترجمان نے بتایا کہ تحقیقات کے دوران گرفتار شدگان نے اپنے جرم کا اعتراف کیا اور البدر سے وابستہ مزید ۵؍ افراد کے ناموں کا انکشاف کیا جو یہ دھماکہ خیز مواد حاصل کرنے اور اس کی ٹرانسپورٹیشن میں ملوث تھے۔انہوں نے کہا کہ اس کیس کی تحقیقات مکمل ہونے کے بعد ایک غیر ملکی جنگجو سمیت آٹھ افراد کے خلاف سرینگر کی ایک خصوصی عدالت میں چالان پیش کیا گیا۔