ہندوستان نے نیشنز کپ میں مسلسل دوسری جیت درج کی

والینسیا//ہندوستانی خواتین کی ہاکی ٹیم نے ایف آئی ایچ ویمنس نیشنز کپ 2022 میں جاپان کو 2-1 سے شکست دے کر اپنی جیت کا سلسلہ جاری رکھا ہندوستان نے پیر کے مقابلے میں سلیمہ ٹیٹے (5ویں منٹ) اور بیوٹی ڈُنگ ڈُنگ (40ویں منٹ) کے گولوں سے جیت درج کی۔ جاپان کی جانب سے واحد گول روئی تاکاشیما نے 49ویں منٹ میں کیا پہلے میچ کی طرح یہاں بھی ہندوستان نے جارحانہ آغاز کیا۔ نوجوت کور نے پانچویں منٹ میں سلیمہ کو پاس دیا جبکہ سلیمہ نے جاپان کے سرکل میں شاندار فٹ ورک کا مظاہرہ کرتے ہوئے گیند کو نیٹ میں پہنچاکر ہندوستان کو 1-0 کی برتری دلادی۔
جاپان نے پہلے کوارٹر کے اختتام سے قبل ایک پنالٹی کارنر حاصل کیا لیکن ہندوستانی دفاع نے انہیں برابری کا موقع نہیں دیا۔
ہندوستان نے دوسرے کوارٹر میں جاپان پر حاوی ہوتے ہوئے دوپنالٹی کارنر حاصل کئے لیکن ان پر اسکور نہیں ہوسکا۔ دوسرے کوارٹر کے بغیر گول رہنے کے بعد، ہندوستان کو تیسرے کوارٹر کے آغاز میں بھی ایک پنالٹی کارنر ملا، حالانکہ اس بار بھی گرجیت کور کی ڈریگ فلک کراس بار کے اوپر سے چلی گئی۔
ہندوستان کے لئے اپنا ڈیبیو کرتے ہوئے بیوٹی نے 40ویں منٹ میں ٹیم کو دوسری کامیابی دلائی۔ اس نے پچ کے وسط میں ایک شاندار ٹیکل کیا اور جاپانی دفاع کو پار کرتے ہوئے ہندوستان کی برتری کو دوگنا کردیا۔
آخری کوارٹر میں تاکاشیما کے گول کے بعد جاپان نے ایک پنالٹی بھی حاصل کی لیکن ہندوستانی دفاع نے اسکور کو 2-1 سے آگے نہیں جانے دیا۔
ہندوستان نے اپنے پہلے میچ میں چلی کو 3-1 سے شکست دی تھی۔ اس جیت کے ساتھ ہی ہندوستان اب گروپ بی میں سرفہرست ہے جبکہ میزبان اسپین نے لگاتار دو میچ جیت کر گروپ اے میں سرفہرست ہے۔
ہندوستان کا اگلا مقابلہ بدھ کو جنوبی افریقہ کے خلاف ہوگا۔