دو دن سے لاپتہ علی گڑھ مسلم یونیورسٹی کا طالبعلم سوپور میں نمودار

سرینگر//
علی گڑھ مسلم یونیورسٹی (اے ایم یو) سے دو دن قبل لاپتہ ہونے والے دسویں جماعت کے ایک طالب علم کا ہفتہ کو پولیس نے ریلوے اسٹیشن سوپور سے سراغ لگایا۔
ایک مقامی خبر رساں ایجنسی نے ایک اہلکار کے حوالے سے اطلاع دی ہے کہ سوپور کے بوہری پورہ علاقے کے مسرور عباس میر کو پولیس نے آج ریلوے اسٹیشن سوپور پر ٹریس کیا۔
اہلکار نے مزید کہا کہ انہوں نے اس کے اہل خانہ کو مطلع کر دیا ہے اور ابھی وہ پوچھ گچھ کے لیے پولیس کے ساتھ تھے۔
مسرور کی ۸ دسمبر کو اے ایم یو سے لاپتہ ہونے کی اطلاع ملی تھی، جب وہ صبح ۸ بجے اسکول کے لیے اپنے ہاسٹل سے نکلے تھے۔
اس سے پہلے ہفتہ کی صبح لاپتہ طالبعلم کے اہل خانہ اور دیگر احباب و اقارب نے ہفتے کے روز اپنے لخت جگر کی بازیابی کے لئے احتجاج درج کیا۔
احتجاجیوں نے جموں وکشمیر انتظامیہ سے اپیل کی کہ وہ ان کے بیٹے کی حفاظت اور صحیح سلامت واپسی کو یقینی بنائیں۔
احتجاجی نعرہ بازی کر رہے تھے اور انہوں نے سوپور، کپوارہ روڈ پر ٹریفک کی نقل و حمل کو بھی کچھ وقت کیلئے بند کر دیا۔
خاندان کے ایک رکن نے میڈیا کو بتایا کہ ہم نے اس (لاپتہ طالب علم) کے ساتھیوں اور اسکول حکام سے رابطہ کیا تاکہ اس کا کوئی اتہ پتہ معلوم کرسکیں لیکن کسی کو معلوم نہیں ہے کہ وہ کہاں ہے ۔انہوں نے کہا کہ ہم نے متعلقہ پولیس تھانوں پر اس کے متعلق ایک رپورٹ درج کی ہے ۔
اہل خانہ نے جموں وکشمیر کے لیفٹیننٹ گورنر منوج سنہا سے لاپتہ طالب علم کی تلاش کیلئے مداخلت کرنے کی اپیل کی۔انہوں نے لوگوں سے بھی اس ضمن میں مدد کرنے کی اپیل کی تھی۔