کٹھوعہ میں دلدوز سڑک حادثہ، ماں بیٹے سمیت تین افراد ہلاک‘دو زخمی

جموں//
جموں وکشمیر کی سڑکوں پر موت کا خونین رقص تھمنے کا نام ہی نہیں لے رہا ہے ۔
ضلع کٹھوعہ میں بدھ کی شام ایک دلخراش سڑک حادثے میں ماں بیٹے سمیت ایک ہی کنبے کے تین افراد جان بحق جبکہ دو دیگر زخمی ہوگئے ۔
ذرائع نے بتایا کہ کٹھوعہ کے بنی علاقے میں بدھ کی شام ایک گاڑی جس میں ایک ہی کنبے کے پانچ افراد سوار تھے ، ڈرائیور کے کنٹرول سے باہر ہوکر قریب تین سو فٹ گہرے نالے میں جا گری جس کے نتیجے میں دو افراد کی بر سر موقع ہی موت واقع ہوگئی۔
ذرائع نے کہا کہ دیگر تین افراد کو فوری طور نکال کر علاج و معالجے کیلئے ہسپتال منتقل کیا گیا جہاں ان میں سے ایک زخموں کی تاب نہ لا کر دم توڑ گیا۔
متوفین کی شناخت ۴۰سالہ مونیکہ گپتا زوجہ سنجے گپتا‘۴۵سالہ شیکھر ولد رام لال اور۱۱سالہ سدارتھ گپتا ولد سنجے گپتا ساکنان آر ایس پورہ جموں کے بطور ہوئی ہے ۔
زخمیوں کی شناخت ۱۸سالہ برباتھ گپتا ولد پون گپتا اور۴۰سالہ روبی گپتا زوجہ راجیش گپتا ساکنان آر ایس پورہ جموں کے طور پر ہوئی ہے دونوں زخمی گورنمنٹ میڈیکل کالج کٹھوعہ میں زیر علاج ہیں۔