سرینگر/20نومبر
جموں وکشمیر کے سرحدی ضلع کپواڑہ کے دیور لولاب علاقے میں درمیانی شب آگ کی ایک واردات کے دوران تین رہائشی مکانات خاکستر ہوئے جبکہ اس دوران دو کمسن بھائی آگ کی لپٹوں میں پھنس کر رہ گئے جس دوران دونوں جھلس جانے سے از جان ہوئے ۔
اطلاعات کے مطابق دیور لولاب کے ککاڈ پتی گاوں میں ہفتے اور اتوار کی درمیانی شب محمد اکبر خان ولد عبدالعزیز خا ن کے مکان سے آگ نمودار ہوئی جس نے آناً فاناً اپنے متصل مزید دو مکانوں کو لپیٹ میں لے لیا۔
معلوم ہوا ہے کہ پولیس ، فائر اینڈ ایمرجنسی اورمقامی لوگوں نے فوری طورپر آگ بجھانے کی کارروائی شروع کی تاہم آتشزدگی کی اس واردات کے دوران تین رہائشی مکان خاکستر ہوئے ۔
مقامی ذرائع نے بتایا کہ جوں ہی علاقے میں آگ نمودار ہوئی تو اس دوران دو کمسن بچے رہائشی مکان میں پھنس کر رہ گئے اگر چہ اُنہیں بچانے کی خاطر سخت کوشش کی گئی تاہم آگ کی تپش کے باعث دونوں جھلس کر برسر موقع ہی از جان ہوئے ۔
کمسن بھائیوں کی شناخت 6 سالہ عامر احمد خان اور 3 سالہ سبزار احمد خان پسران محمد اکبر خان کے بطور ہوئی ہے ۔
پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی۔
