میلبورن// پاکستان کے کپتان بابر اعظم نے انگلینڈ کے خلاف ٹی 20 ورلڈ کپ کے فائنل سے قبل ہفتہ کو کہا کہ ان کی ٹیم نے آخری چار میچوں میں اچھی کارکردگی کا مظاہرہ کیا اور وہ فائنل میں بھی اس لے کو آگے بڑھانا چاہیں گے۔
بابر نے میچ سے پہلے پریس کانفرنس میں کہا کہ ہم نے پہلے دو میچ ہارے لیکن پھر جس طرح سے ہم نے آخری چار میچوں میں واپسی کی وہ قابل ستائش کارکردگی تھی۔ ہم نے اس دوران اچھا کرکٹ کھیلا ہے اور ہم فائنل میں بھی اس کو برقرار رکھنے کی کوشش کریں گے۔
ٹی20 ورلڈ کپ 2022 کا فائنل پاکستان اور انگلینڈ کے درمیان یہاں میلبورن کرکٹ گراؤنڈ میں اتوار کو ہندوستانی وقت کے مطابق دوپہر 1:30 بجے کھیلا جائے گا۔ جب پاکستان نے اپنا آخری میچ ہندوستان کے خلاف میلبورن کرکٹ گراؤنڈ میں کھیلا تھا اس میچ کو دیکھنے کے لیے 90 ہزار سے زائد کرکٹ شائقین اسٹیڈیم میں جمع ہوئے تھے۔ پاکستان اور نیوزی لینڈ کے درمیان سڈنی کرکٹ گراؤنڈ میں کھیلے گئے سیمی فائنل میں بھی تقریباً 36 ہزار افراد نے شرکت کی۔ بابر نے کہا کہ پورے آسٹریلیا میں موجود شائقین سے ملنے والی حمایت انہیں بہترکارکردگی دکھانے کی طاقت فراہم کرتی ہے۔
بابر نے کہا، “وہ ہمیں اعتماد دیتے ہیں اور ہم جہاں بھی، جس اسٹیڈیم میں بھی جاتے ہیں، انہیں پاکستانی ٹیم کی حمایت کرتے ہوئے دیکھ کر بہت اچھامحسوس ہوتا ہے۔ ہم میچ جیتنے اور ان کے چہرے پر مسکراہٹ لانے کے لیے اپنا 100 فیصد دینے کی کوشش کرتے ہیں۔‘‘
بابر کو یقین ہے کہ ان کی ٹیم اتوار کو ٹی ٹوئنٹی ورلڈ چیمپئنز کا ٹائٹل جیتے گی، حالانکہ وہ انگلینڈ کی صلاحیتوں سے بھی پوری طرح واقف ہیں۔
بابر نے کہا، “انگلینڈ ایک اچھی ٹیم ہے اور اس کے پاس اچھے کھلاڑی ہیں۔ ہمیں اپنے منصوبوں کو عملی جامہ پہنانے کی پوری کوشش کرنی ہوگی۔”