سرینگر//
جنوبی ضلع اننت ناگ کے گواس کپرن علاقے میں آتشزدگی کی ایک واردات کے دوران مسجد شریف اور پانچ رہائشی مکانوں کو نقصان پہنچا ہے۔
فائر اینڈ ایمرجنسی عملے کی کارروائی کے نتیجے میں آگ کو مزید پھیلنے سے روک دیا گیا۔
یو این آئی اردو کے نامہ نگار نے بتایا کہ جنوبی ضلع اننت ناگ کے گواس پکڑ بور کپرن گاوں میں ہفتے کی سہ پہر رہائشی مکان سے آگ نمودار ہوئی جس نے آناً فاناً اپنے متصل کئی مکانوں کو لپیٹ میں لے لیا۔
نمائندے نے بتایا کہ فائر اینڈ ایمرجنسی اور مقامی لوگوں کی کارروائی کے نتیجے میں اگر چہ آگ پر قابو پایا گیا تاہم آتشزدگی کی اس واردات کے دوران نصف درجن کے قریب مکانات جل کر خاکستر ہوئے جبکہ مسجد شریف کو بھی نقصان پہنچا۔
معلوم ہوا ہے کہ ہے کہ آتشزدگی کی اس واردات کے دوران لاکھوں روپے مالیت کی اشیاء راکھ کے ڈھیر میں تبدیل ہوئی اور پانچ کنبوں کے افراد کھلے آسمان تلے زندگی گزارنے پر مجبور ہوگئے ہیں۔
فائر اینڈ ایمرجنسی سروس کے ایک عہدیدار نے یو این آئی اردو کو بتایا کہ ہفتے کی سہ پہر گواس کپرن گاوں میں آگ نمودار ہونے کی اطلاع ملتے ہی فائر اینڈ ایمرجنسی سروس کے اہلکار جائے موقع پر پہنچے۔انہوں نے بتایا کہ کئی فائر ٹینڈروں کی مدد سے آگ پر قابو پایا گیا تاہم آتشزدگی کی اس واردات کے دوران پانچ رہائشی مکان اور ایک مسجد شریف کو نقصان پہنچا ہے۔
یہ رپورٹ فائل کرنے تک علاقے میں فائر اینڈ ایمرجنسی کے اہلکار مسلسل آگ بجھانے کی کارروائی میں مصروف تھے۔
دریں اثنا پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی۔