بیٹی کی شادی سے محض ایک ہفتہ قبل والد ولر جھیل میں ڈوب کر جاں بحق

بانڈی پورہ//
شمالی کشمیر کے بانڈی پورہ ضلع کے لہڑوال پورہ علاقے میں بدھ کو ولر جھیل میں ڈوبنے کے بعد ایک ۴۵ سالہ شخص کی موت ہو گئی جبکہ دیگر دو کو بچا لیا گیا۔
ایک اہلکار نے ایک مقامی خبر رساں ایجنسی کو بتایا کہ بانڈی پورہ کے بنیاری علاقے کے رہنے والے جاوید احمد ڈار ولد غلام محمد ڈار ڈوب کر ہلاک ہو گئے جبکہ دو دیگر کو مقامی لوگوں اور پولیس نے بچا لیا۔
اہلکار نے کہا کہ تینوں بید کی ٹہنیاں لے کر جا رہے تھے جب ضلع کے بنیاری گاؤں میں نیچیئر نالہ کے قریب ان کی کشتی ڈوب گئی۔
خاندانی ذرائع کے مطابق جاوید آٹھ بچوں کا باپ ہے جن میں چھ بیٹیاں اور دو بیٹے شامل ہیں۔ انہوں نے کہا’’جاوید کی بیٹیوں میں سے ایک اگلے ہفتے شادی کرنے والی تھی‘‘۔
علاقے میں خبر پھیلتے ہی پورے علاقے میں غم کی لہر دوڑ گئی اور سینکڑوں لوگ تعزیت کے لیے متوفی کے گھر پہنچ گئے۔
واضح رہے کہ وولر جھیل میں کشتی الٹنے سے تین افراد ڈوب گئے تھے جہاں دو افراد کو فوری طور پر بچا لیا گیا تھا جبکہ تیسرا لاپتہ تھا جس کی تلاش کے لیے ریسکیو آپریشن شروع کیا گیا تھا۔ تاہم، لاپتہ شخص کی لاش کو بعد میں جھیل سے برآمد کر لیا گیا۔