سرینگر//
وزیر دفاع راج ناتھ سنگھ نے جمعرات کو کہا کہ پاکستان اپنے مقبوضہ کشمیر میں لوگوں کے خلاف مظالم کر رہا ہے اور اسے اس کا خمیازہ بھگتنا پڑے گا۔
پاکستان کے زیر قبضہ جموں کشمیر کو دوبارہ حاصل کرنے کا اشارہ دیتے ہوئے وزیر نے کہا کہ جموں و کشمیر اور لداخ کے جڑواں مرکز کے زیر انتظام علاقوں میں مجموعی ترقی کا ہدف ’گلگت اور بلتستان تک پہنچنے کے بعد‘حاصل کیا جائے گا ۔
سنگھ کاکہنا تھا’’ہم نے ابھی جموں کشمیر اور لداخ میں ترقی کا سفر شروع کیا ہے۔ جب ہم گلگت اور بلتستان پہنچیں گے تو ہم اپنا مقصد حاصل کریں گے۔‘‘
وزیر دفاع نے ’شوریہ دیوس‘ تقریب سے خطاب کرتے ہوئے کہا ’’ ۱۹۴۷ میں آج کے دن ہندوستانی فضائیہ کی سرینگر میں لینڈنگ ہوئی۔
پاکستان کے زیر قبضہ کشمیر میں پاکستانی مظالم کا حوالہ دیتے ہو ئے وزیر دفاع نے کہا کہ پڑوسی ملک کو ’’اس کے نتائج بھگتنا ہوں گے‘‘۔
پاکستان پر انسانی حقوق کے نام پر مگرمچھ کے آنسو بہانے کا الزام لگاتے ہوئے سنگھ نے کہا’’پاکستان کے مقبوضہ کشمیر کے لوگوں کا درد صرف انہیں ہی نہیں بلکہ ہمیں بھی پریشان کرتا ہے‘‘۔
وزیر دفاع کاکہنا تھا’’جموں کشمیر نے کشمیریت کے نام پر جو دہشت گردی کا ’تانڈو‘ دیکھا ہے اسے بیان نہیں کیا جا سکتا‘‘۔انہوں نے زور دے کر کہا کہ دہشت گردی کا کوئی مذہب نہیں ہوتا اور دہشت گردوں کا واحد مقصد ہندوستان کو نشانہ بنانا ہے۔
سنگھ نے دعویٰ کیا کہ گزشتہ چند سالوں میں دہشت گردوں کے خلاف کارروائیوں کے دوران بعض نام نہاد دانشوروں نے انسانی حقوق کی خلاف ورزیوں کا رونا رویا ہے۔
وزیر دفاع نے کہا کہ۵؍اگست ۲۰۱۹ کو آرٹیکل ۳۷۰ کو منسوخ کرنے کے مرکز کے فیصلے نے جموں کشمیر میں لوگوں کے ساتھ امتیازی سلوک کو ختم کیا۔انہوں نے کہا کہ۵ اگست۲۰۱۹ کو وزیر اعظم نریندر مودی کی قیادت میں جموں و کشمیر کے لوگوں کے ساتھ امتیازی سلوک ختم ہو گیا تھا۔
اس سے پہلے۷۶ ویں انفنٹری ڈے کے موقع پر، وزیر دفاع راج ناتھ سنگھ نے جمعرات کو بڈگام میں ہندوستانی فوج کی طرف سے منعقد ’شوریہ دیوس‘ پروگرام میں شرکت کی۔
جموں و کشمیر کے لیفٹیننٹ گورنر منوج سنہا بھی اس پروگرام میں موجود تھے۔ سنگھ نے اس موقع پر ہندوستانی فوج کی ایک نمائش کا بھی دورہ کیا۔
انفنٹری ڈے کو آزاد ہندوستان کے پہلے فوجی واقعہ کی یاد میں منایا جاتا ہے، جب ہندوستانی فوج نے وادی کشمیر میں۲۷؍ اکتوبر۱۹۴۷ کو ہندوستانی سرزمین پر پہلا حملہ پسپا کیا تھا۔
یہ فتح سکھ رجمنٹ کی پہلی بٹالین کے اہلکاروں نے حاصل کی۔
۷۶ویں انفنٹری ڈے کے موقع پر وزیر دفاع نے بہادر پیدل فوج کے جوانوں اور ان کے اہل خانہ کو بھی مبارکباد اور نیک تمناؤں کا اظہار کیا۔
سنگھ نے ٹویٹ کیا’’۷۶ویں انفنٹری ڈے پر، ہمارے بہادر پیادہ اہلکاروں اور ان کے اہل خانہ کو مبارکباد اور پرتپاک خواہشات۔ ہندوستانی پیدل فوج انتہائی جرأت اور پیشہ ورانہ مہارت کے ساتھ وابستہ رہی ہے۔ قوم ان کی بہادری، قربانی اور خدمات کو سلام کرتی ہے،‘‘۔
راج ناتھ سنگھ اس ماہ جموں و کشمیر کا دورہ کرنے والے دوسرے اعلیٰ مرکزی وزیر ہیں۔اس سے قبل مرکزی وزیر داخلہ امت شاہ۴؍اکتوبر سے مرکزی زیر انتظام علاقے کے تین روزہ دورے پر تھے۔بعد میں، وزیر دفاع مرکزی زیر انتظام علاقہ لداخ کے دو روزہ دورے پر لیہہ پہنچیں گے۔
ہندوستانی فوج ہر سال۲۷؍ اکتوبر کو’انفنٹری ڈے‘ کے طور پر مناتی ہے، کیونکہ اس دن سکھ رجمنٹ کی پہلی بٹالین سری نگر ایئربیس پر اتری اور پاک فوج کے ناپاک عزائم کو ناکام بنانے کے لیے عزم اور غیر معمولی جرات کا مظاہرہ کیا۔ ۱۹۴۷ میں قبائلی حملہ آوروں کی مدد سے کشمیر پر حملہ کیا تھا۔یہی وجہ ہے کہ ہر سال۲۷؍ اکتوبر کو ہندوستانی فوج اسے ’انفنٹری ڈے‘ کے طور پر مناتی ہے۔
اس سال ہندوستانی فوج اور فضائیہ دونوں اس خاص دن کو ’شوریہ دیوس‘ کے طور پر منانے جا رہے ہیں کیونکہ جمعرات کو ہندوستانی فضائیہ کے کشمیر ایئر بیس کی گولڈن جوبلی کا جشن بھی ہے۔