نئی دہلی//
مرکزی وزیر داخلہ امت شاہ نے آج کہا کہ آرٹیکل۳۷۰ کی منسوخی کے بعد جموں کشمیر میں جنگجویانہ سرگرمیوں میں۲۴ فیصد کمی آئی ہے۔
شاہ نے یہ بات ہریانہ کے سورج کنڈ میں داخلی سلامتی سے متعلق مسائل پر تبادلہ خیال کیلئے دو روزہ ’چنتن شیویر‘ کا افتتاح کرنے کے بعد کہی۔
افتتاحی اجلاس سے خطاب کرتے ہوئے وفاقی وزیر داخلہ نے کہا کہ دفعہ ۳۷۰ کی تنسیخ کے بعد سیکورٹی اہلکاروں کی اموات میں ۶۴ فیصد اور عام شہریوں کی اموات میں ۹۰ فیصد کمی ریکارڈ کی گئی ہے۔ اس کے علاوہ جموں و کشمیر میں اس وقت سے ۵۷ہزارکروڑ روپے کی سرمایہ کاری بھی دیکھی گئی ہے۔
شاہ نے یہ کہا کہ حکومت نے ۲۰۲۴ تک ہر ریاست میں نیشنل انویسٹی گیشن ایجنسی (این آئی اے) کی شاخیں قائم کرنے کا فیصلہ کیا ہے۔
سرحد پار سے ہونے والے جرائم سے مؤثر طریقے سے نمٹنے کیلئے ریاستوں اور مرکز کی اجتماعی ذمہ داری پر زور دیتے ہوئے شاہ نے کہا کہ این آئی اے کو خصوصی اختیارات دیے گئے ہیں۔
شاہ نے کہا’’ہمارے آئین میں امن و امان ریاست کے دائرہ اختیار میں ہے‘لیکن ہم سرحد پار یا سرحدی جرائم کے خلاف اسی وقت کامیاب ہو سکتے ہیں جب تمام ریاستیں مل بیٹھ کر ان پر غور کریں، مشترکہ حکمت عملی بنائیں اور ان پر قابو پانے کی کوششیں کریں۔‘‘
یہ دعویٰ کرتے ہوئے کہ مودی حکومت کی دہشت گردی اور متعلقہ جرائم کے لیے صفر رواداری کی پالیسی ہے، شاہ نے کہا کہ این آئی اے دہشت گردی کی تحقیقات میں بہتر تال میل کے لیے اپنے غیر ملکی ہم منصبوں کے ساتھ تعلقات استوار کرنے کی سمت کام کر رہی ہے۔
وفاقی وزیر داخلہ نے کہا کہ ملک اسی وقت ترقی کرسکتا ہے جب اس ملک کی تمام ایجنسیوں کے درمیان قریبی تعاون ہو۔ انہوں نے کہا کہ آزادی کے امرت کال میں تعاون پر مبنی وفاقیت کا جذبہ محرک ہونا چاہئے اور اس اعتماد کا اظہار کیا کہ یہ چنتن شیویر ملک میں علاقائی تعاون کو مزید وسعت دے گا۔
کانفرنس میں جموں کشمیر کے لیفٹیننٹ گورنر ‘منوج سنہا بھی شرکت کررہے ہیں۔ وزیر اعظم ‘نریندرا مودی جمعہ کو کانفرنس سے خطاب کریں گے ۔