نئی دہلی/ 27 اکتوبر
مرکزی وزیر داخلہ امت شاہ نے آج کہا کہ آرٹیکل 370 کی منسوخی کے بعد جموں کشمیر میں جنگجو سرگرمیوں میں 34 فیصد کمی آئی ہے۔
شاہ نے یہ بات ہریانہ کے سورج کنڈ میں داخلی سلامتی سے متعلق مسائل پر تبادلہ خیال کےلئے 2 روزہ ’چنتن شیویر‘ کا افتتاح کرنے کے بعد کہی۔
افتتاحی اجلاس سے خطاب کرتے ہوئے وفاقی وزیر داخلہ نے یہ بھی کہا کہ حکومت نے 2024 تک ہر ریاست میں نیشنل انویسٹی گیشن ایجنسی (این آئی اے) کی شاخیں قائم کرنے کا فیصلہ کیا ہے۔
دفعہ 370 کی تنسیخ کے بعد سیکورٹی اہلکاروں کی اموات میں 64 فیصد اور عام شہریوں کی اموات میں 90 فیصد کمی ریکارڈ کی گئی ہے۔ اس کے علاوہ جموں و کشمیر میں اس وقت سے 57,000 کروڑ روپے کی سرمایہ کاری بھی دیکھی گئی ہے۔
سرحد پار سے ہونے والے جرائم سے مو¿ثر طریقے سے نمٹنے کے لیے ریاستوں اور مرکز کی اجتماعی ذمہ داری پر زور دیتے ہوئے شاہ نے کہا کہ این آئی اے کو خصوصی اختیارات دیے گئے ہیں۔
شاہ نے کہا”ہمارے آئین میں امن و امان ریاست کے دائرہ اختیار میں ہے‘لیکن ہم سرحد پار یا سرحدی جرائم کے خلاف اسی وقت کامیاب ہو سکتے ہیں جب تمام ریاستیں مل بیٹھ کر ان پر غور کریں، مشترکہ حکمت عملی بنائیں اور ان پر قابو پانے کی کوششیں کریں۔“
یہ دعویٰ کرتے ہوئے کہ مودی حکومت کی دہشت گردی اور متعلقہ جرائم کے لیے صفر رواداری کی پالیسی ہے، شاہ نے کہا کہ این آئی اے دہشت گردی کی تحقیقات میں بہتر تال میل کے لیے اپنے غیر ملکی ہم منصبوں کے ساتھ تعلقات استوار کرنے کی سمت کام کر رہی ہے۔