جموں//
سیکورٹی فورسز نے ہفتہ کے روز ایک مشترکہ آپریشن میں جموں کشمیر کے رام بن ضلع کے جنگلاتی علاقے میں دہشت گردوں کے ایک ٹھکانے کا پردہ فاش کیا، جس کے نتیجے میں گولہ بارود اور دھماکہ خیز مواد کا ایک بڑا ذخیرہ برآمد ہوا۔
پولیس نے ایک بیان میں کہا’’آج، ضلع رام بن کی تحصیل کھاری کے دور افتادہ پہاڑی اور جنگلاتی علاقے میں اسلحہ، گولہ بارود اور متعلقہ مواد کے ذخیرے کی موجودگی کے بارے میں قابل اعتماد ذرائع سے ایک اطلاع موصول ہوئی‘‘۔
پولیس کے مطابق اطلاع پر تیزی سے کام کرتے ہوئے پولیس اور فوج کا مشترکہ تلاشی آپریشن جنگلاتی علاقے میں شروع کیا گیا اور مشتبہ ٹھکانوں کی تلاشی لی گئی جو شام تک جاری رہی جس کے دوران سیکورٹی فورسز نے دہشت گردوں کے ایک مشتبہ ٹھکانے کا پردہ فاش کیا اور جائے وقوعہ سے بھاری مقدار میں اسلحہ اور گولہ بارود سمیت دیگر چیزوں کا ذخیرہ برآمد کر لیا۔
ایف آئی آر نمبر۲۳۷/۲۰۲۲ کے تحت۷/۲۵ آرمس ایکٹ اور سیکشن۴دھماکہ خیز مواد ایکٹ کے تحت پولیس تھانہ بانہال میں مقدمہ درج کیا گیا ہے اور تحقیقات شروع کی گئی ہے۔
اس سے پہلے ۱۳؍ اکتوبر کو، سیکورٹی فورسز نے جموں کشمیر کے رامبن ضلع کے گول علاقے میں ایک لاوارث بیگ سے تین مشتبہ دیسی ساختہ دھماکہ خیز آلات (آئی ای ڈی) اور کچھ پلوں کے حکمت عملی کے نقشے برآمد کیے تھے۔