جموں میں اب تک ڈینگوسے پانچ کی موت

جموں//
پرنسپل گورنمنٹ میڈیکل کالج جموں‘ ڈاکٹر ششی سودان کا کہنا ہے کہ ہسپتال میں اب تک ڈینگو سے پانچ مریضوں کی موت واقع ہوئی ہے جبکہ زائد از ایک ہزار مریضوں کو داخل کیا گیا ہے ۔
ڈاکٹر سودان نے کہا کہ جن مریضوں کی موت واقع ہوئی ہے ان کا تعلق در درازعلاقوں سے تھا اور انہیں کافی دیر بعد یہاں ریفر کیا گیا تھا۔ان کا کہنا تھا کہ ڈینگو سے متاثرہ جن مریضوں کو بر وقت داخل کیا جاتا ہے وہ صد فی صد ٹھیک ہوجاتے ہیں۔
پرنسپل نے ان باتوں کا اظہار جمعرات کو یہاں میڈیا کے ساتھ بات کرتے ہوئے کیا۔
ڈاکٹر سودان نے کہا’’جی ایم سی میں اب تک سو۵۶مریض داخل ہوئے ہیں ‘پانچ مریضوں کی موت ہوئی ہے ۔جن کی موت واقع ہوئی ہے وہ در دراز علاقوں سے تھے اور انہیں کافی دیر بعد یہاں ریفر کیا گیا تھا‘‘۔
پرنسپل جی ایم سی جموں کا کہنا تھا کہ جو مریض یہاں بر وقت داخل ہوجاتے ہیں وہ صد فیصد ٹھیک ہوجاتے ہیں۔
ڈاکٹر سودان نے کہا کہ جی ایم سی میں مریضوں کیلئے بھر پور انتظامات کئے گئے ہیں۔انہوں نے کہا کہ مریضوں کا یہاں پروٹوکال کے مطابق علاج کیا جا رہا ہے جیسے جیسے چلینجز بڑھ رہے ہیں ہم بھی سہولیات میں اضافہ کر رہے ہیں۔ان کا کہنا تھا کہ ڈینگو سے متاثرہ مریضوں کو ہمارے ساتھ جڑے رہنے کی ضرورت ہے ۔
جی ایم سی پرنسپل نے کہا کہ لوگوں کو مچھر کو کنٹرول کرنا چاہئے مچھر نہیں ہوں گے تو ڈینگو نہیں ہوگا۔انہوں نے کہا کہ جن مریضوں کی موت ہوئی وہ کٹرہ، اکھنور جیسے دور علاقوں کے تھے ۔
ان کا کہنا تھا کہ جی ایم سی میں اس کیلئے علیحدہ وارڈ کا بندو بست کیا گیا ہے ۔