سرینگر/18اکتوبر
جنوبی ضلع شوپیاں کے حرمین گاوں میں ملی ٹینٹوں نے درمیانی شب غیر مقامی مزدوروں پر گرینیڈ سے حملہ کیا جس کے نتیجے میں اُتر پردیش سے تعلق رکھنے والے ۲غیر مقامی مزدور برسر موقع ہی از جان ہوئے ۔
پولیس کے ایک ترجمان نے بتایا کہ پہاڑی ضلع شوپیاں کے حرمین گاوں میں پیر اور منگل کی درمیانی شب ملی ٹینٹوں نے کرایہ کے کمرے میں رہائش پذیر غیر مقامی مزدوروں پر گرینیڈ سے حملہ کیا جس کے نتیجے میں دو مزدور شدید طورپر زخمی ہوئے ۔
ترجمان نے بتایا کہ دونوں کو علاج ومعالجہ کی خاطر نزدیکی ہسپتال منتقل کیا گیا تاہم وہاں پر تعینات ڈاکٹروں نے اُنہیں مردہ قرار دیا۔
ہلاک شدگان کی شناخت مونش کمار اور رام ساگر ساکن کنوج اُتر پردیش کے بطور ہوئی ہے ۔
پولیس ترجمان نے بتایا کہ سیکورٹی فورسز نے ایک وسیع علاقے کو محاصرے میں لے کر حملہ آوروں کی بڑے پیمانے پر تلاش شروع کی ہے ۔
بتادیں کہ ہفتے کے روز ملی ٹینٹوں نے چودھری گنڈ شوپیاں میں کشمیری پنڈت کوگولی مار کر ہلاک کردیا تھا۔
ضلع میں کشمیری پنڈتوں اور غیر مقامی مزدوروں پر ہو رہے حملوں کے بعد سیکورٹی کے غیر معمولی انتظامات کئے گئے ہیں۔
ذرائع نے بتایا کہ شوپیاں ضلع میں غیر مقامی مزدوروں اور کشمیری پنڈتوں کی حفاظت کویقینی بنانے کی خاطر اضافی اہلکاروں کی بھی تعیناتی عمل میں لائی گئی ہے ۔
سیکورٹی ذرائع کے مطابق شوپیاں میں رات بھر چھاپہ مار کارروائیوں کا سلسلہ جاری رہا جس دوران کئی مشتبہ افراد کو بھی حراست میں لیا گیا ہے ۔
