کپوارہ میں ایک شخص سے اسلحہ و گولہ باردو بر آمد‘گرفتار:پولیس

سرینگر//
پولیس نے شمالی ضلع کپوارہ کے کرناہ علاقے میں ایک شخص کو اسلحہ و گولہ بارود سمیت گرفتار کرنے کا دعویٰ کیا ہے ۔
ایک پولیس ترجمان نے اپنے ایک بیان میں کہا کہ مصدقہ اطلاع موصول ہونے پر پولیس اور فوج ایک مشترکہ ٹیم نے کپوارہ کے حاجیترا کرناہ میں محمد شفیع شیخ ولد علی اکثر شیخ کے مکان کی تلاشی کی۔
ترجمان نے کہا کہ پوچھ تاچھ کے دوران محمد شفیع نے انکشاف کیا کہ اس نے ایک سلائی مشین میں کچھ اسلحہ و گولہ بارود چھپا رکھا ہے ۔
ان کا بیان میں کہنا تھا کہ مذکورہ شخص کے انکشاف پر مکان کی تلاشی کے دوران ایک پستول، دو پستول میگزین، گیارہ گولیاں اور دو گرینیڈ بر آمد کئے گئے جس کے بعد محمد شفیع کو گرفتار کیا گیا۔
پولیس بیان کے مطابق اس ضمن میں محمد شفیع کے خلاف ایک کیس درج کیا گیا اور مزید تحقیقات شروع کی گئیں۔
پولیس ترجمان نے کہا کہ محمد شفیع کے خلاف اس نوعیت کا ایک کیس پہلے ہی درج ہے ۔انہوں نے کہا کہ اس سلسلے میں مزید گرفتاریاں متوقع ہیں۔
اس دوران جموںکشمیر کے سرنکوٹ پونچھ کے سنگلا گاوں میں سیکورٹی فورسز نے پیر کے روز تلاشی آپریشن کے دوران جنگجووں کی کمین گاہ سے بڑی مقدار میں اسلحہ وگولہ بارود اور قابل اعتراض مواد برآمد کرکے ضبط کیا۔
سرکاری ذرائع نے بتایا کہ سیکورٹی فورسز نے مصدقہ اطلاع موصول ہونے کے بعد پونچھ کے سنگلا گاوں میں ملی ٹینٹوں کی کمین گاہ سے آئی ای ڈی بیٹریز، گولیوں کے متعدد راونڈ، پستول ، پستول میگزین‘اے کے میگزین، اے کے گولیوں کے راونڈ، ہینڈ گرینیڈس ، یو بی جی ایل گرینیڈس کے علاوہ بارودی مواد بھی برآمد کرکے ضبط کیا۔
ذرائع نے بتایا کہ علاقے میں تلاشی آپریشن ہنوز جاری ہے ۔