کشمیر محفوظ ترین جگہ بن گئی ہے:شاہ

راجوری//
مرکزی وزیر داخلہ امت شاہ کا کہنا ہے کہ دفعہ ۳۷۰کی تنسیخ کے بعد جموں و کشمیر ایک محفوظ ترین جگہ بن گئی ہے کیونکہ ملی ٹنسی سے متعلق واقعات میں نمایاں کمی واقع ہوئی ہے ۔
شاہ نے کہا کہ وزیر اعظم نریندر مودی کی ملی ٹنٹوں اور علیحدگی پسندوں کے خلاف پائیدار مہم ثمر آور ثابت ہوئی ہے اور آج یہاں کے نوجوانوں کے ہاتھوں میں پتھر کی بجائے لیپ ٹاپ ہیں۔
وزیر داخلہ نے ان باتوں کا اظہار منگل کو راجوری میں ایک بڑے عوامی جلسے کے خطاب کے دوران کیا۔
شاہ نے کہا’’جو لوگ کہا کرتے تھے کہ اگر دفعہ۳۷۰ہٹایا گیا تو خون کی ندیاں بہہ جائیں گی ان کو جموں وکشمیر میں ہونے والے ملی ٹنسی سے متعلق واقعات کے اعداد و شمار دیکھنے چاہئے ‘‘۔
وفاقی وزیر داخلہ کا کہنا تھا’’جموں وکشمیر میں ہر سال ملی ٹنسی سے متعلق۴۷۶۷واقعات رونما ہوتے تھے لیکن دفعہ۳۷۰کی تنسیخ کے بعد ان اعداد و شمار میں نمایاں کمی واقع ہوئی ہے اور اس نوعیت کے صرف۷۲۱واقعات پیش آئے ہیں‘‘۔
شاہ نے کہا کہ ما بعد پانچ اگست۲۰۱۹جموں وکشمیر میں سیکورٹی فورسز کی ہلاکتوں کی تعداد میں بھی کمی واقع ہوئی ہے جو اب ہر سال۱۳۷تک پہنچ گئی ہے ۔انہوں نے کہا کہ ملی ٹنٹوں اور علیحدگی پسندوں کے خاتمے کیلئے وزیر اعظم نریندر مودی کی طرف سے چلائی جانے والے پائیدار مہم ثمر آور ثابت ہوئی ہے ۔
وفاقی وزیر داخلہ کا کہنا تھا’’اس مہم کا نتیجہ یہ ہے کہ آج جموں وکشمیر محفوظ ترین جگہ ہے وزیر اعظم جموں وکشمیر کے نوجوانوں تک پہنچے اور آج ان کے ہاتھوں میں پتھر نہیں بلکہ لیپ ٹاپ ہیں اور یہ نوجوان ملک کے نوجوانوں کے ساتھ ہر شعبے میں مقابلہ کر رہے ہیں‘‘۔
شاہ نے گجر، بکروال اور پہاڑی طبقے کے لوگوں سے مخاطب ہو کر کہا کہ جموں وکشمیر میں ان تین خاندانوں، جنہوں نے حکومت اپنے آپ، اپنے رشتہ داروں اور دوستوں تک محدود رکھی ہے ، کی ہر الیکشن میں شکست کو یقینی بنائیں۔
وزیر داخلہ نے کہا’’ان تین خاندانوں نے۷۰برسوں تک یہاں خاندانی راج کیا اور عام لوگوں کو جمہوریت کیلئے ترسایا‘‘۔ان کا کہنا تھا’’آج یہاں لوگوں کو گرام پنچایت ہے ، ضلع پنچایت اور تحصیل پنچایت ہے جو گذشتہ۷۰برسوں کے دوران نہیں ہوا کرتا تھا‘‘۔
وزیر داخلہ نے کہا کہ جموں وکشمیر میں جمہوریت کو۸۷؍ارکان اسمبلی اور۶؍ارکان پارلیمان تک محدود رکھا گیا تھا جبکہ گجر، بکر وال اور پہاڑی طبقوں کو نظر انداز کیا گیا تھا۔انہوں نے کہا کہ غلام نبی کھٹانہ کو راجیہ سبھا کے لئے نامزد کرکے وزیر اعظم نریندر مودی نے یہ بات ثابت کر دی کہ وہ سماج کے تمام طبقوں کو نمائندگی دینے کیلئے پر عزم ہیں۔
شاہ کا کہنا تھا کہ دفعہ۳۷۰کی تنسیخ کے بعد جموں و کشمیر میں۵۶ہزار کروڑ روپیوں کی بیرونی سرمایہ کاری ہوئی ہے جس سے یہاں کے نوجوانوں کو روز گار کے موقعے میسر ہوں گے ۔
وفاقی وزیر داخلہ نے کہا کہ رشوت جو یہاں گذشتہ۷۰برسوں کے دوران عروج پر تھی، کے خاتمے کو یقینی بنانے کے لئے ہم نے انٹی کورپشن بیورو بنایا۔انہوں نے جموں و کشمیر کے لیفٹیننٹ گورنر منوج سنہا کی مہاراجہ ہری سنگھ کے جنم دن پر سرکاری تعطیل رکھنے کے اعلان کی سراہنا کی۔
شاہ کا کہنا تھا کہ پہلی بار سرینگر سے شارجہ راست پروازیں چالو کی گئیں اور سرینگر میں شبانہ پروازوں کا آپریشن بھی شروع کیا گیا۔
مرکزی وزیر داخلہ نے کہا کہ جموں وکشمیر کی تاریخ میں پہلی بار سال رواں کے ماہ اول سے۶۲ء۱کروڑ سیاحوں نے یہاں کے سیاحتی مقامات کی سیر کی۔انہوں نے کہا کہ حد بندی کمیشن کو گجر، بکروال اور پہاڑی طبقوں کو نمائندگی دینے کیلئے تشکیل دیا گیا جو بصورت دیگر ایک خواب ہی تھا۔
ان کا لوگوں کی طرف مخاطب ہوتے ہوئے کہنا تھا’’یہاں کے حکمرانوں نے ہمیشہ آپ لوگوں کا استحصال کیا‘‘۔انہوں نے کہا کہ وزیر اعظم نریندر مودی کی قیادت والی سرکار جموں و کشمیر کو تمام طبقوں گجر، بکروال اور پہاڑی سمیت نئی بلندیوں تک لے جانے کیلئے پُر عزم ہیں۔