سرینگر/۲ اکتوبر
پولیس نے اتوار کو جنوبی کشمیر کے شوپیاں ضلع کے باسکوچن علاقے میں ایک مسلح تصادم میں ایک دہشت گرد کو ہلاک کرنے کا دعویٰ کیا ہے۔
ایک پولیس ترجمان نے کہا”شوپیاں کے باسکو چن علاقے میں جھڑپ شروع ہو گئی ہے۔ پولیس اور سیکورٹی فورسز کام پر ہیں۔ مزید تفصیلات آگے آئیں گی“۔
ترجمان نے مزید کہا”ایک دہشت گرد مارا گیا۔ سرچ آپریشن جاری ہے۔ مزید تفصیلات آگے آئیں گی“۔
اس سے پہلے پولیس کے ایک ترجمان نے بتایا کہ جنوبی کشمیر کے پہاڑی ضلع شوپیاں کے باس کوچھن گاوں میں ملی ٹینٹوں کے چھپے ہونے کی ایک خاص اطلاع موصول ہونے کے بعد پولیس اور سیکورٹی فورسز نے اتوار اعلیٰ الصبح علاقے کو اپنے محاصرے میں لے کر اُنہیں ڈھونڈ نکالنے کے لئے گھر گھر تلاشی کارروائی کا آغاز کیا۔
ترجمان نے بتایا کہ خود کو سلامتی عملے کے گھیرے میں پا کر ملی ٹینٹوں نے اندھا دھند گولیاں برسا کر فرا ر ہونے کی بھر پور سعی کی تاہم حفاظتی عملے کی کارگر حکمت عملی نے اُنہیں فرار ہونے کا کوئی موقع فراہم نہیں کیا اور اس طرح سے طرفین کے مابین جھڑپ شروع ہوئی۔
پولیس ترجمان نے بتایا کہ سیکورٹی فورسز نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔
ذرائع نے بتایا کہ گاوں میں دو سے تین ملی ٹینٹ موجود ہو سکتے ہیں۔آخری اطلاعات موصول ہونے تک علاقے میں آپریشن ہنوز جاری تھا۔
