معیشت پہلے کے مقابلے میں زیادہ مضبوط ہے: سعودی وزیرِ خزانہ

الریاض///
سعودی عرب کے وزیرِ خزانہ محمد الجدعان کا کہنا ہے کہ سعودی معیشت پہلے کے مقابلے میں زیادہ مضبوط ہو گئی ہے۔
سعودی دارالحکومت ریاض میں یورو منی کانفرنس سے خطاب کرتے ہوئے سعودی وزیرِ خزانہ محمدالجدعان نے کہا کہ ملک میں مالیاتی اصلاحات کا کام جاری ہے۔
ان کا کہنا ہے کہ حکومت افراطِ زر کنٹرول کیے ہوئے ہے، گزشتہ برسوں کے دوران پوری دنیا اقتصادی چیلنجوں سے دو چار رہی۔
محمد الجدعان نے کہا کہ اس سال دوسری سہ ماہی کے دوران تیل کے سوا معیشت میں 5.4فیصد شرحِ نمو ہوئی، مجموعی قومی پیداوار میں 11.8فیصد شرح نمو رہی۔
انہوں نے مزید کہا ہے کہ آئی ایم ایف نے توقع ظاہر کی ہے کہ 2022ء کے دوران سعودی معیشت 7.6فیصد شرحِ نمو حاصل کر لے گی۔
سعودی عرب کے وزیرِ خزانہ محمد الجدعان کا یہ بھی کہنا ہے کہ کوشش ہے کہ 2030ء تک مجموعی قومی پیداوار میں نجی شعبے کا حصہ 65 فیصد تک پہنچ جائے ۔