دیوالی سے شروع ہوجائیگی جیو کی ۵جی سروس‘امبانی کا اعلان

ممبئی دلی//
ہندوستان کی سب سے بڑی ٹیلی کام کمپنی ریلائنس جیو نے پیر کو اس سال دیوالی تک دہلی، ممبئی، کولکتہ اور چنئی میں اپنی ۵جی خدمات شروع کرنے کا اعلان کیا، جس کا مقصد دسمبر ۲۰۲۳ تک پورے ملک میں توسیع اور احاطہ کرنا ہے۔
ریلائنس انڈسٹریز لمیٹڈ کی آج یہاں ممبئی میں ۴۵ویں سالانہ جنرل میٹنگ ہوئی جس میں چیئرمین ‘ مکیش امبانی نے اعلان کیا کہ اس دیوالی سے جیو کی۵ جی خدمات شروع ہوجائیںگی۔
چیئر مین نے کہا’’ آج میں جیو۵ جی کا اعلان کرنا چاہتا ہوں۔ ہم ۱۰۰ ملین گھروں کو منفرد ڈیجیٹل تجربات اور سمارٹ ہوم حل کے ساتھ جوڑیں گے اور ملک میں جیو کی ۵جی سروع آئندہ دیوالی تک شروع ہوجائے گی۔‘‘
اس سے پہلے انہوں نے کہا کہ مجھے ہماری ذاتی گفتگو اور ہماری گرمجوشی سے ملاقاتیں یاد ہیں۔’’ مجھے پوری امید ہے کہ اگلے سال ہم ایک ہائبرڈ موڈ پر ملیں گے، جو جسمانی اور ڈیجیٹل دونوں طریقوں کا مجموعہ ہوگا۔ انہوں نے کہا کہ وزیر اعظم نریندر مودی نے اپنی ۱۵؍اگست کی تقریر میں پنچ پران یا پانچ ضروریات کی بات کی، جو یقینا۲۰۴۷ تک ہندوستان کو ایک ترقی یافتہ ملک بنا دے گی‘‘۔
امبانی نے کہا ’’آج ہمارے ۴جی نیٹ ورک پر ۴۲۰ ملین موبائل براڈ بینڈ صارفین ہیں اور وہ ہر ماہ اوسطاً۲۰ جی بی ڈیٹا استعمال کرتے ہیں‘‘۔انہوںنے مزید کہا کہ ہمارے وزیر اعظم‘ نریندر مودی کے ڈیجیٹل انڈیا کے ویڑن سے متاثر ہو کر، ملک نے کئی عالمی معیار کے قومی پلیٹ فارم دیکھے ہیں جیسے آدھار، جن دھن، روپے، یو پی آئی، آیوشمان بھارت، سٹارٹ اپ انڈیا۔ انہوں نے کہا کہ ریلائنس جیو کا اعلیٰ معیار کا، مضبوط اور ہمیشہ چلنے والا فائبر آپٹک نیٹ ورک ہندوستان کے ڈیٹا ٹریفک کی ریڑھ کی ہڈی ہے۔