سرینگر/ 29اگست
غلام بنی آزاد کی جانب سے کانگریس سے علیحدگی کے بعد پارٹی سے لیڈران اور کارکنان کی جانب سے مستعفی ہونے کا سلسلہ تیسرے روز بھی جاری رہا۔
معلوم ہوا ہے ہے کہ کٹھوعہ سے تعلق رکھنے والے تین سابق ممبران اسمبلی نے پارٹی ہائی کمانڈ کوخط کے ذریعے استعفیٰ دینے کے بارے میں آگاہی فراہم کی ۔
یو این آئی اردو کو معلوم ہوا ہے کہ پیر کے روز سابق ممبر اسمبلی کٹھوعہ بانی میر ملک ، سابق ایم ایل سی سبھاش گھپتا اور شام لال بھگت نے کانگریس سے مستعفی ہونے کا اعلان کیا۔
ذرائع نے بتایا کہ پیر کے روز نئی دہلی میں جموں وکشمیر سے تعلق رکھنے والے متعدد پارٹی کے سینئر لیڈران نے آزاد صاحب کے ساتھ ملاقات کی۔
غلام نبی آزاد کے قریبی ساتھی جی ایم سروری نے بتایا کہ مزید تین کانگریس لیڈران نے پارٹی سے مستعفی ہونے کا اعلان کرتے ہوئے ہمیں بھی اُس کی کاپی بھیجی ہے ۔
اُن کے مطابق آنے والے دنوں کے دوران متعدد لیڈران کی آزاد گروپ میں شمولیت کا امکان ہے ۔
دریں اثنا ذرائع نے بتایا کہ سابق نائب وزیر اعلیٰ تارا چند ، سابق وزراءعبدالمجید وانی، موہن لال شرما ، گرور رام ، سابق ایم ایل اے بلوان سنگھ نے نئی دہلی میں غلام نبی آزاد کے ساتھ ملاقات کی۔
ذرائع نے بتایا کہ چار ستمبر کو جموں دورے کے دوران مذکورہ لیڈران بھی کانگریس پارٹی سے مستعفی ہو رہے ہیں۔
