جموں شہر میں سمارٹ بجلی میٹروں نے کام کرنا شروع کیا

جموں/۲۱مارچ
لیفٹیننٹ گورنر‘ منوج سِنہا نے کہا ہے کہ بلا تعطل بجلی کی فراہمی کو یقینی بنانے کی سمت میں ایک اہم قدم کے طور پر سمارٹ میٹر وںکے ساتھ نصب کئے جانے والے علاقوں کو آخری صارف تک معیاری بجلی بلا خلل فراہم کی جائے گی۔
لیفٹیننٹ گورنر نے اعلان کیا کہ آج سے جموں کے ۴فیڈروں سے جڑے۶۶۰۳سمارٹ میٹر گھرانوں کو معیاری بجلی ملے گی۔
جموں کے کنونشن سینٹر میں ایک تقریب کے دوران لیفٹیننٹ گورنر نے کہا’’ میں لوگوں سے اپیل کرتا ہوں کہ وہ سمارٹ میٹر لگائیں، چوری پر قابوپانے اور فضول خرچی کو کم کرنے میں اِنتظامیہ کی مدد کریں‘‘۔
سنہانے کہا کہ یہ اِقدام صارفین کو اَپنے بجلی کے اِستعمال کی نگرانی کرنے اور اس کے مطابق اسے منظم کرنے کے قابل بنائے گا۔اُنہوں نے کہا کہ پری پیڈ فیچر آنے والے دِنوں میں فعال کیا جائے گااورصارفین کو مطلوبہ بجلی فراہم کرے گا۔
لیفٹیننٹ گورنر نے مزیدکہا کہ کشمیر میں بھی اِسی طرح کے اِنتظامات کی تقلید کی جارہی ہے۔انہوںنے کہاکہ گذشتہ سات دہائیوں سے بجلی صلاحیت کو بڑھانے کے لئے کوئی قابلِ اعتماد کو ششیں نہیں کی گئیں اور نہ ہی ترسیل اور تقسیمی صلاحیت کو مضبوط کیا گیا۔
سنہا نے کہاکہ موجودہ حکومت گذشتہ ڈیڑھ برس سے صارفین کو بجلی کی قابل اعتماد فراہمی کو یقینی بنانے کے ساتھ ساتھ ٹرانسمیشن کے نقصانات کو کم کرنے اور ڈسٹری بیوشن کی کارکردگی کو بہتربنانے کے لئے مسلسل کوششیں کر رہی ہے۔