سپریم کورٹ نے جنتر منتر کو احتجاجی مقام کی فہرست سے ہٹانے پر مرکز سے جواب طلب کیا

نئی دہلی، 16اکتوبر (یواین آئی) سپریم کورٹ نے جمعرات کو مرکزی حکومت سے پوچھا کہ کیا جنتر منتر کو مقررہ احتجاجی مقام کی فہرست سے ہٹانے کا فیصلہ 9 اکتوبر کے اس کے حکم کے بعد کیا گیا تھا۔
چیف جسٹس سوریہ کانت اور جسٹس جائے مالیا باگچی کی بنچ نے جنتر منتر کو دوبارہ احتجاجی مقام قرار دینے کی درخواست پر مرکز سے جواب طلب کیا۔ بنچ نے یہ بھی پوچھا کہ کیا یہ فیصلہ عدالت کے زبانی تبصروں کی وجہ سے کیا گیا یا مقام کی افادیت پر آزادانہ طور پر غور کیا گیا تھا۔
مرکز کی جانب سے پیش ہوئے سالیسٹر جنرل تشار مہتا نے کہا کہ یہ فیصلہ سپریم کورٹ کے حکم کی بنیاد پر نہیں کیا گیا۔ انہوں نے بتایا کہ پہلے تشکیل دی گئی ایک کمیٹی نے اپنی تفصیلی رپورٹ میں احتجاج کے لیے متبادل مقامات کی سفارش کی تھی۔ تاہم، دہلی پولیس نے 13 اکتوبر کو دہلی ہائی کورٹ میں کہا تھا کہ یہ فیصلہ سپریم کورٹ کے 9 اکتوبر کے حکم کی بنیاد پر کیا گیا۔
درخواست گزار کی جانب سے سینئر وکیل مکتا گپتا نے دلیل دی کہ پرامن احتجاج کے حق کو محض رسمی کارروائی نہیں بنایا جا سکتا۔ انہوں نے کہا کہ احتجاجی مقام حکومت کے مرکز کے کافی قریب ہونا چاہیے تاکہ لوگوں کی شکایات مؤثر طریقے سے سنی جا سکیں۔
جسٹس باگچی نے کہا کہ عدالت پہلے حکومت سے جواب طلب کرے گی اور اس کے بعد معاملے پر غور کرے گی۔ سینئر وکیل گوپال شنکرنارائنن نے بھی جنتر منتر کو دوبارہ احتجاجی مقام قرار دینے کی درخواست کی۔
یہ تنازع 11 اکتوبر کو دہلی پولیس کمشنر انوراگ کمار کے جاری کردہ مستقل حکم کے بعد شروع ہوا تھا، جس میں جنتر منتر کو احتجاجی مقامات کی فہرست سے ہٹا کر رام لیلا میدان، براڑی میدان اور مشرقی دہلی کے سی بی ڈی میدان کو متبادل مقامات قرار دیا گیا تھا۔
وکیل سواتی سنگھ کی درخواست میں کہا گیا ہے کہ جنتر منتر سے احتجاج ہٹانے سے اظہار رائے کی آزادی اور پرامن طور پر جمع ہونے کے حق پر اثر پڑتا ہے، کیونکہ مظاہرین کو ان اداروں اور لوگوں سے دور کردیا جاتا ہے جن تک وہ اپنی بات پہنچانا چاہتے ہیں۔