ترکیہ سمیت 19 ممالک کی کولمبیا کے اسرائیل میں سفارت خانے کو القدس منتقل کرنے کی مذمت

انقرہ، 16 اکتوبر (یو این آئی) اسرائیل کے لیے کولمبیا کےالقدس میں سفارتخانہ کھولنے کی 19 ممالک کے وزرائے خارجہ نے سخت مذمت کی۔
ترکیہ، الجزائر، جبوتی، انڈونیشیا، فلسطین، قطر، کویت، لبنان، لیبیا، ملائیشیا، مصر، پاکستان، صومالیہ، سوڈان، شام، سعودی عرب، عمان، اردن اور یمن کے وزرائے خارجہ نے کولمبیا کے اسرائیل میں موجود سفارتخانے کو تل ابیب سے القدس منتقل کرنے کے بارے میں مشترکہ بیان جاری کیا۔
بیان میں کہا گیا ہے کہ مذکورہ ممالک کے وزرائے خارجہ کولمبیا کے القدس میں سفارتخانہ کھولنے کو اقوامِ متحدہ کی سلامتی کونسل کی متعلقہ قراردادوں کی خلاف ورزی قرار دیتے ہیں اور دو ریاستی حل کی بنیاد پر منصفانہ اور پائیدار امن کے قیام کے لیے بین الاقوامی کوششوں کو نقصان پہنچانے والا اقدام ہونے کے ناطے، اس کی سخت مذمت اور قطعی طور پر مسترد کرتے ہیں۔
بیان میں یہ زور دے کر کہا گیا کہ وزرائے خارجہ نے تصدیق کی ہے کہ مقبوضہ قدس کی قانونی یا تاریخی حیثیت کو تبدیل کرنے یا قدس کو اسرائیل کا دارالحکومت تسلیم کرنے کے زیرِمقصد کیے جانے والے کسی بھی اقدام یا فیصلے کو باطل سمجھا جائے گا اور وہ کسی قانونی نتیجے کے حامل نہیں ہوں گے۔ یہ موقف اقوامِ متحدہ کی سلامتی کونسل کی 476 (1980) اور 478 (1980) سمیت متعلقہ قراردادوں کے مطابق ہے، جو القدس کے کردار یا حیثیت کو تبدیل کرنے کی کوششوں کو مسترد کرتی ہیں اور ریاستوں سے یہ درخواست کرتی ہیں کہ وہ 1967 میں قبضہ کیے گئے فلسطینی علاقوں کے ایک حصّےالقدس سے اپنے سفارتی مشن ہٹا دیں۔
بیان میں کہا گیا کہ وزرائے خارجہ نے کولمبیا حکومت پر زور دیا ہے کہ وہ اس فیصلے پر نظرِ ثانی کرے اور اسے واپس لے، بین الاقوامی قانون کے تحت اپنی ذمہ داریوں کی پاسداری کرے اور ایسے اقدامات سے گریز کرے جو فلسطینی عوام کے جائز حقوق کو نقصان پہنچائیں، جن میں مشرقی القدس کو دارالحکومت ماننے والا ایک آزاد اور خودمختار فلسطینی ریاست رکھنے کا حق بھی شامل ہے۔
کولمبیا نے تل ابیب میں موجود اپنے اسرائیلی سفارتخانے کو 46 سال بعد قدس منتقل کر دیا تھا۔
اسرائیل کے وزیر خارجہ گیڈیون سار اور کولمبیائی ہم منصب عمر بولا ایسکوبار قدس میں نئے سفارتخانے کی افتتاحی تقریب میں شریک ہوئے تھے۔
اسرائیل نے 1980 میں یکطرفہ طور پر القدس کو اپنا ‘دارالحکومت’ اعلان کر دیا تھا، اس میں 1967 میں اس کے زیرِ قبضہ مشرقی القدس بھی شامل ہے۔ باوجود اس کے کہ دنیا بھر کے کئی ممالک قدس کو اسرائیل کا دارالحکومت تسلیم نہیں کرتے اور ان کے سفارت خانے تل ابیب میں واقع ہیں۔
امریکہ، گوئٹے مالا، ہونڈوراس، کوسوو، پیراگوئے، پاپوا نیو گنی اور فجی کے اسرائیل میں موجود سفارت خانے قدس میں ہیں۔ علاوہ ازیں، صومالیہ سے یکطرفہ طور پر آزادی کا اعلان کرنے والی اور جسے اسرائیل نے تسلیم کیا ، صومالی لینڈ نے بھی اسرائیل میں اپنا مبینہ سفارت خانہ قدس میں کھولا تھا۔