مینڈھر/۱۰؍اکتوبر
جموں و کشمیر کے ضلع پونچھ میں لائن آف کنٹرول (ایل او سی) کے ساتھ فوج نے پانچ بارودی سرنگوں کا پتہ لگا کر انہیں محفوظ طریقے سے ناکارہ بنا دیا۔ حکام نے ہفتہ کو یہ اطلاع دی۔
حکام کے مطابق، ہفتہ کی صبح فوجی گشتی دستے نے سرحدی باڑ کے قریب باسونی ٹاپ علاقے میں دو بارودی سرنگوں کا پتہ لگایا، جبکہ اسی علاقے میں تین دیگر بارودی سرنگیں ایک روز قبل ملی تھیں۔
انہوں نے بتایا کہ فوج کے بم ناکارہ بنانے والے دستے نے ان دھماکہ خیز مواد کو کنٹرولڈ دھماکوں کے ذریعے تباہ کر دیا۔ اس کارروائی میں کسی قسم کا نقصان نہیں ہوا۔
حکام کے مطابق، لائن آف کنٹرول کے اگلے علاقوں میں دراندازی روکنے کے نظام کے تحت مختلف مقامات پر بارودی سرنگیں نصب کی گئی ہیں۔ تاہم، شدید بارشوں کے باعث بعض اوقات یہ سرنگیں اپنی جگہ سے بہہ کر ایسے علاقوں میں پہنچ جاتی ہیں جہاں ان سے خطرہ پیدا ہو سکتا ہے۔
۔۔۔۔۔۔۔۔۔(ایجنسیاں )
