نیپال میں اسکول بس کھائی میں گرنے سے چار طلبہ سمیت پانچ افراد ہلاک، 14 زخمی

کاٹھمنڈو، 9 اکتوبر (یو این آئی) نیپال کے ضلع کاسکی میں پوکھرا شہر کے قریب جمعہ کی صبح ایک اسکول بس گہری کھائی میں گر گئی، جس کے نتیجے میں چار طلبہ سمیت پانچ افراد کی موت ہو گئی، جبکہ 14 دیگر زخمی ہو گئے۔
ضلع کاسکی پولیس دفتر کے مطابق، حادثہ اس وقت پیش آیا جب کالیکا بورڈنگ اسکول کی بس طلبہ کو لے کر واپس آ رہی تھی۔ بس میں مجموعی طور پر 19 افراد سوار تھے، جن میں زیادہ تر طلبہ تھے۔
اسپتال میں مردہ قرار دیے گئے پانچ افراد میں سے چار کی شناخت ہو گئی ہے۔ ان میں ممتا تیواری (15)، اسیم کندیل (13)، شوبھیچھا تیواری (15) اور ایک طالب علم کے والد بابورام تیواری (65) شامل ہیں۔ تقریباً 15 سالہ ایک دیگر طالبہ کی شناخت ابھی نہیں ہو سکی ہے۔
حادثے کے فوراً بعد زخمیوں کو علاج کے لیے ویسٹرن ریجنل اسپتال پہنچایا گیا۔ اسپتال انتظامیہ کے مطابق، تمام 14 زخمیوں کا علاج جاری ہے، جن میں سے دو کی حالت تشویش ناک ہے۔ شدید زخمی 16 سالہ اشمی کندیل کو انتہائی نگہداشت کے شعبے (آئی سی یو) میں رکھا گیا ہے۔
ضلع کاسکی پولیس دفتر کے ترجمان بیرندر پاسوان نے بتایا کہ حادثے کی وجوہات کا ابھی پتہ نہیں چل سکا ہے اور معاملے کی تحقیقات کی جا رہی ہیں۔