16ویں ہاکی انڈیا سینئر مردوں کی قومی چیمپئن شپ کل جھانسی میں شروع ہوگی

جھانسی، 9 اکتوبر (یواین آئی) 16ویں ہاکی انڈیا سینئر مردوں کی قومی چیمپئن شپ 2026 ہفتہ سے اتر پردیش کے جھانسی میں شروع ہوگی۔ چیمپئن شپ میں تین ڈویژن میں 29 ٹیمیں حصہ لیں گی اور مقابلے 21 اکتوبر تک جاری رہیں گے۔
ڈویژن اے میں 12 ٹیموں کو چار پول میں تقسیم کیا گیا ہے۔ پول اے میں پنجاب، تمل ناڈو اور بنگال، پول بی میں مدھیہ پردیش، مہاراشٹر اور پڈوچیری، پول سی میں اتر پردیش، کرناٹک اور چنڈی گڑھ جبکہ پول ڈی میں منی پور، ہریانہ اور دہلی شامل ہیں۔ ہر پول کی دو سرفہرست ٹیمیں کوارٹر فائنل میں پہنچیں گی، جو 18 اکتوبر کو کھیلے جائیں گے۔ سیمی فائنل 19 اکتوبر جبکہ تیسری پوزیشن کا میچ اور فائنل 21 اکتوبر کو ہوگا۔
ڈویژن بی میں 10 ٹیمیں اور ڈویژن سی میں سات ٹیمیں حصہ لیں گی۔ ڈویژن بی کے پول اے میں اڈیشہ، آسام، کیرالہ، اتراکھنڈ اور چھتیس گڑھ، جبکہ پول بی میں جھارکھنڈ، تلنگانہ، گوا، دادرا و نگر حویلی و دمن و دیو اور اروناچل شامل ہیں۔ ڈویژن سی کے پول اے میں میزورم، ہماچل پردیش اور جموں و کشمیر، جبکہ پول بی میں آندھرا پردیش، راجستھان، بہار اور گجرات شامل ہیں۔
ڈویژن بی اور سی کے مقابلے 10 اکتوبر سے شروع ہوں گے، جبکہ ڈویژن اے کے میچ 14 اکتوبر سے کھیلے جائیں گے۔ گزشتہ سال ہاکی پنجاب نے فائنل میں ہاکی مدھیہ پردیش کو 4-1 سے شکست دے کر ڈویژن اے کا خطاب جیتا تھا، جبکہ اتر پردیش ہاکی نے منی پور ہاکی کو 5-1 سے ہرا کر تیسری پوزیشن حاصل کی تھی۔